Дариға Назарбаеваның төрағалығымен өткен Парламент Сенаты Бюросының отырысында палатаның 30 мамырда болатын отырысының күн тәртібі белгіленді.
Тұңғыш Президент – Елбасыға Қазақстан мемлекеттілігінің негізін қалаушы ретінде, Конституцияны, адам мен азаматтың құқықтары мен бостандықтарын қорғауды, қоғамды топтастыруды қамтамасыз етудегі, ел дамуының стратегиялық бағытын айқындаған тарихи еңбегінің мойындалуының көрінісі «Құрметті Сенатор» мәртебесінің берілуі болмақ.
Қазақстан Республикасының демократиялық, зайырлы, құқықтық және әлеуметтік мемлекет ретінде конституциялық-құқықтық негіздерін қалыптастыруға, сондай-ақ отандық парламентаризмнің қалыптасуы мен дамуына зор үлес қосқаны үшін Елбасыға «Құрметті Сенатор» мәртебесі беріледі. Бюро мүшелері Мемлекет басшысы Қ.Тоқаевтың бұл бастамасына бірауыздан қолдау білдірді.
«Елбасының басқаруымен тәуелсіздік кезіндегі Қазақстанның жеткен жетістіктері оның осы бастаған жолының да, бағытының да дұрыстығын көрсетеді. Елбасы Сенат жұмысына әр уақытта терең мән берді, Сенат жұмысының ыңғайлы болуына барлық мүмкіндікті жасап отырды. Сенат өмірі Елбасының қойып отырған барлық мақсатымен тікелей тығыз байланысты болып келе жатыр» деді Жоғарғы палата төрағасының орынбасары Б.Бекназаров.
«Біздің қазіргі Конституциямыз да, сол Конституция бойынша жұмыс істеп жатқан қос палатаның қызметі де Елбасының үлкен бастамасының, авторлығының арқасында жүзеге асты. 1995 жылғы Конституциямыз посткеңестік елдер ішінде бірінші рет қос палаталы Парламент жасақтауға мүмкіндік берді. Соның негізінде Сенаттың алғашқы күнінен бүгінге дейінгі жұмысы Елбасының тікелей қамқорлығымен, басшылығымен жүзеге асып келе жатыр деп нық сеніммен айта аламыз. Елбасы мемлекет қалыптастырушы, тәуелсіз Қазақстанның негізін салушы тұлға ғана емес, сонымен қатар қос палаталы парламентаризмнің де негізін салған қайраткер. Сондықтан Қасым-Жомарт Кемелұлының бұл ұсынысын қолдаймыз және әбден орынды деп есептейміз» деді М.Құл-Мұхаммед.
Сенатор Б.Әйтімова Елбасының Сенат отырыстарында сөз сөйлеп, кез келген тақырып бойынша ұсыныстар айту, еліміздің барлық азаматы мен мемлекеттік институттардың тыныс-тіршілігі туралы ойларын ортаға салу мүмкіндіктерінің маңызды екенін атап өтті.
«Мен бұл мәселені толық қолдаймын. Өйткені ол Елбасының мемлекетіміздің қалыптасуы мен дамуына қосқан зор үлесінің мызғымастығы бекітілген Қазақстанның Конституциясына сәйкес келеді» деді сенатор Г.Ким.
«Құрметті Сенатор» мәртебесін беру туралы шешім Парламент Сенатының жалпы отырысында қабылданады.