Nur Otan партиясы әркез жарқын істердің бастамашысы болып, халықтың кез келген тобына әлеуметтік көмек көрсетіп келеді. Алматыда сондай берекелі тағы бір шара бастау алды.
Партияның қалалық филиалының ұйымдастыруымен «Мобильді «Халыққа көмек» атты акциясы аясында тұрғындарға көмек көрсетілді. Партияның ізгі шарасына мемлекеттік және құқықтық органдар да үн қосып, атсалысты.
Акцияның басты мақсаты – жылжымалы мобильді көмек көрсетуді қолға алу. Соның аясында қала тұрғындарының шешілмей жүрген өзекті мәселелерін қарастырып, «Шеті жоқ қала» концепциясы аясында Алматыға қосылған елдімекендердің әлеуметтік-экономикалық жағдайларын бақылау және оны дамытуды қолға алу. Маңызды шара барысында тұрғындарға заңдық және құқықтық кеңес беріліп, олардың проблемасын шешу жолдары ұсынылды. Шаһардағы «Ақбұлақ» базарында 15 жылдан бері жұмыс істеп келе жатқан Райхан Корнелюк те мүмкіндікті пайдаланып, тиісті орган қызметкерлеріне жағдайын айта келіпті.
– Мұнда сауда жасайтын біз сияқты адамдардың бір күн ғана демалысы бар. Ол демалыста көбі қалаға барып, әлеуметтік-құқықтық мәселелерін шеше алмайды. Сондықтан осындай жылжымалы мобильді көмектің жұмыс орнымызға келіп, тиісті кеңестер беріп жатқаны қуантады. Біздерді тұрғын үй, жеңілдетілген шартпен берілетін несие, азаматтық алу мәселелері толғандырады. Қазір арнайы мекемелерден келген азаматтарға сол сауалдарымызды қойып, жауап аламыз деп үміттенемін, – дейді кәсіпкер.
Бақыт Биқожаев болса, осы сауда орнында бірнеше жылдан бері арба итеріп, табыс табады. Табысым тұрақты емес, бірақ сонда да осы арқылы нанымды айырып, бала-шағамды асырап жүрмін дейді ол.
– Табыс бірде жетеді, бірде жетпейді. Сол себепті, жеке баспанаға қол жеткізе алмай келе жатырмын. Енді келіп отырған мамандардан баспана жайын, шарттарын сұрап, талпынып көрсем деймін. Келіншегім де жеке шаруамен айналысады. Бізді елеп-ескеріп, көмек ұсынып жатқан Nur Otan партиясына алғыс айтамын, – дейді Бақыт Биқожаев.
Шараны ұйымдастырушы қалалық партия филиалы төрағасының бірінші орынбасары Станислав Конкуров бастама қала бойынша қарқынды түрде жалғасатынын айтты.
– Мемлекеттік органдармен бірлесе отырып, 15 басқарманың өкілдерін осында алып келдік. Базардағы саудагерлер, қара жұмыс істейтін адамдар бәрі жаппай келіп, көкейдегі сұрақтарын қойып жатыр. Көбі үй, несие жайын сөз етеді. Апта сайын шаһардың басқа аудандарындағы сауда нүктелерін аралап, осы акцияны жалғастырамыз. Жалпы, бұл шара жыл соңына дейін жалғасады. Бізге келіп түскен мәселелерді қарастырып, шешу жолдарын ұсынып, тікелей өзіміз бақылаймыз, – дейді Станислав Конкуров.
Акция халыққа тек тиісті көмек беріп қана қоймай, оның шешілуін де қадағалайды. Сондай-ақ әлеуметтік кикілжің тудыратын себептердің де алдын алумен айналыспақ.