– Нұралы Әліп пен Сұлтанбек Астанов Ұлттық құрама сапында жүрген кезде тапсырған COVID-19 тестінде оң нәтиже көрсетті. Қазір футболшылар ұлттық құрамадан оқшауланды. Футболшылардың денсаулығы жақсы, дәрігерлердің қарауында, – делінген хабарламада. Осы жағдайдан соң, апта басында команданың барлық футболшысы, бапкерлері және команда қызметкерлері тест тапсырды. Оның қорытындысы бойынша, өзге футболшылардан, қызметкерлерден вирус табылмады.Біз осы орайда белгілі спорт маманынан вирустың қазақстандық футболшыларға залалы тимей ме және ішкі чемпионаттың тоқтауына себеп болмай ма деген сауал қойғанбыз.
– Командадағы бір-екі футболшыдан коронавирустың табылуы чемпионатты тоқтатуға себеп бола қоймайтын секілді. Өйткені Еуропадағы командалардың жарты құрамы да осындай жағдайға тап болды. Бірақ кездесулерді кейінге шегеріп, вирус жұқтырған ойыншаларды оқшаулап қана жатыр. Бұрын бір футболшыдан коронавирус анықталса, бүкіл команданы карантинге жауып тастайтын. Қазір тек сол ойыншаларды ғана белгілі бір уақытқа, яғни екі аптаға оқшаулайды. Бұл коронавирустың емі де табылып келе жатқанын аңғартса керек. Адамдар да коронавируспен бірге өмір сүруге ептеп үйренісіп жатқандай көрінеді. Басында жұрттың бәрі дүрлігуші еді. Кейін бұған да еті үйренді. Әлемдегі әйгілі футболшылардың өзі де бұл індетке шалдықты. Ибрагимович, Роналду секілді футболшылар қазіргі кезде оқшауланып жатыр. Сондықтан қазақстандық футболшылардан коронавирус табылды деп байбалам салудың, үрейленудің қажеті жоқ. Қажетті сақтық шараларын сақтаса, екі аптаға карантинге жатса, өзге спортшылар секілді аурудан құлан таза жазылып шығады, – дейді Qazsport арнасының коментаторы Ермек Төрениязов.Спорт журналисі Қуаныш Қаппас өз кезегінде коронавирус індетінің әлемдік спортқа ауыр соққы болып тигенін, соның салдарынан спорттық шараларға біршама өзгеріс енгізілгенін айтып отыр.
– Ең алдымен көптеген айтулы жарыстар кейінге шегерілді. Оның ішінде Токио Олимпиадасын ерекше айтсақ болады. Қазіргі кезде ақырындап болса да жарыстар өткізілуде. Осы орайда, жарысты ұйымдастыру комитеті бірінші кезекте маска тағу, әлеуметтік арақашықтық пен регламентті сақтауға жауапты болды. Қатысушылардың барлығы коронавирустың жоғын дәлелдейтін тест көрсетуі тиіс. Спортшылар күн сайын дене қызуын өлшеп, адамдар көп жиналатын жерге бармай, қоғамдық көлікке мінбеуі қажет. Жарыс кезінде әрбір қатысушы әр күн сайын тест тапсырып, аренадағы қатал талаптарды сақтайды. Тәртіп бұзған жағдайда, жарыстан шеттетіледі. Футбол ойынында бұрынғыдай үш емес, бес ойыншыға қосалқы құрамнан алаңға шығуға рұқсат етті. Кейінгі кезде стадионға ақырындап болса да белгілі бір мөлшерде жанкүйерлерді кіргізіп жатыр. Бұл да болса бағы қалыпқа келу үшін жасалынып жатқан жағдай болса керек. Бастысы, адамдар сақтық шараларын қатаң түрде сақтаса болғаны, – дейді ол.Бұған дейін «Барыс» хоккей командасының бір топ ойыншылары да вирус жұқтырғаны жөнінде ақпарат шыққан. Кейін команда мүшелері, қызметкерлер толықтай оқшауланып, қажетті сақтық шараларын ұстанды. Екі апталық карантиннен соң, «Барыс» кейінге шегерілген кездесулерін толық құрамда өткізіп жатыр. Карантиндегі «Қайраттың» қос футболшысы Нұралы Әліп пен Сұлтанбек Астанов та жақында қайта қатарға қосылады. Сондықтан байбалам салуға, уайымға берілуге еш негіз жоқ. Бастысы, дер кезінде дәрігерлер көрсеткен барлық талапты орындап, тәртіпке бағыну қажет. Сонда ғана бәрі бәз баяғы қалпына келеді. Қорыта айтқанда, бізді індеттен темірдей тәртіп пен тазалық, сақтық қана құтқара алады.
Абылайхан ЖҰМАШ