«Балапанды күзде санайды» дейді халқымыз. Әдеттегідей, Нұр-Сұлтан қаласындағы Орталық коммуникациялар қызметінде облыс әкімдерінің БАҚ өкілдеріне ұсынатын күзгі есебін тыңдау науқаны басталып кетті. Биылғы баспасөз конференциясына бірінші болып Түркістан облысының әкімдігі келді. Өңір басшысы Өмірзақ Шөкеев кездесуде облыстың экономикалық-әлеуметтік дамуы және сан түрлі салада атқарылған жұмыстар туралы баяндады.
АЛЫП ҚҰРЫЛЫС АЛАҢЫ
– Өздеріңізге мәлім, Қазақстанның Тұңғыш Президенті, Елбасы Н.Назарбаевтың Жарлығымен Түркістан қаласының облыс орталығы болғанына небәрі бір жылдан аса уақыт өтті. Ежелгі түркі әлемінің талбесігі – Түркістан дамудың жаңа сатысына көтеріліп келеді. Бүгінде 2 миллионнан астам тұрғыны бар өңірдің тыныс-тіршілігі жаңаша қалыпқа еніп, облыс орталығы Түркістан алып құрылыс алаңына айналды,– деп бастады әңгімесін әкім.
Ө.Шөкеевтің айтуынша, Түркістан қаласындағы құрылыс барысы – өңірдегі ең маңызды басым бағыттың бірі. Бұл тұрғыда құрылысы төрт бағыт бойынша жүріп жатыр. Біріншісі – қаланың айналасына жасыл белдеу қалыптастырып, ауа райы қолайлы шаһарға айналдыру. Түркістанның жасыл белдеуінің жалпы аумағы – 7 700 гектар жер. Сондай-ақ тек облыс орталығы ғана емес, облыс бойынша 2021 жылға дейін 3,5 млн түп көшет егу жоспарланып отыр. Одан бөлек, Түркістан қаласының азық-түлік белдеуін құру қолға алынған. Бұл белдеу бойынша қаладан 15 шақырым шеңберінде жаңа технологияның көмегімен азық-түлік өндіретін кешендер салынбақ.
Агроөнеркәсіп кешені саласындағы «Түркістан агро» инвестициялық жобасы аясында облыста егісті алқапты тамшылатып суаруға мүмкіндік беретін машина-трактор стансасы құрылуда. Осы мақсатта АҚШ-тан 18 бірлік суару машинасы және 27 ауыл шаруашылығы техникасы сатып алыныпты. Өңірде жалпы құны 1,5 млрд теңгеге жуық ауқымды жұмыс «Қазагроқаржы» АҚ тарапынан лизинг шарты негізінде несиелендірілген. Жоба аясында «1 200 басқа арналған тауарлы сүт фермасы» жобасы іске асырылады.
Екінші бағыт – Түркістан қаласының өз басындағы құрылыс. Яғни, әкімшілік-іскерлік орталығын қалыптастыру. Әкім құрылыс жұмысы талапқа сай жүріп жатқанын айтты. Көне шаһарда республика өңірлері әкімдіктері мен ұлттық компаниялар және бизнес өкілдері тарапынан 26 нысанның құрылысы жүргізілуде. «Бір сөзбен айтқанда, жаңадан қала салынып жатыр деуге болады» деді Ө.Шөкеев.
Үшінші бағыт – туризм. Түркістан – қазақтың ғана емес, күллі түркі халқының қасиетті орны. Киелі мекен, шырайлы шаһар. Бұл тұрғыда құрылыстың маңызды бір тармағы тарихи-мәдени орталық салуға бағытталған. Өңір басшысы айтқандай, Түркістан туризмінің ерекшелігі – көлік-логистика қызметінің арзандығы, қонақүйлер бағасының қолжетімділігі, құнарлы тағам және сапалы қызмет түрлерімен ерекшеленбек. Түркістан облысы орталығы атанды деген хабардың өзі туристердің көбірек келуіне түрткі болған. «Биыл біздің өңір мен облыс орталығына АҚШ-тан, Түркиядан, Еуродан туристер көп келді. Сондай-ақ Өзбекстанның Самарқанд пен Бұқара қаласын көруге келген шетелдіктер міндетті түрде Түркістанға соғып, аралауды мақсат ететінін байқап жүрміз. Себебі Ясауи кесенесі – өз дәуірінен бүгінге жеткен айрықша сәулет өнерінің жемісі. Ол дәуірдегі көне ғимараттардың бәрі бірдей бүгінге жеткен жоқ. Келушілерді ғимараттың ерекшелігі мен Қожа Ахмет Ясауиге қатысты аңыз-әңгімелер, тарих ерекше қызықтырады. Демек,Түркістанның туристік әлеуеті болашақта дами түсері анық» деді облыс әкімі.
Төртінші бағыт – тұрғын үй құрылысы. Жыл соңына дейін Түркістан қаласы әкімшілік-іскерлік орталығында 2 351 пәтерлік 52 тұрғын үй пайдалануға беріледі. Оның ішінде, алдағы қараша айында 205 пәтерді құрайтын 7 үйдің құрылысы аяқталса, қалған 610 пәтерлік 19 үй жыл соңына дейін берілуі тиіс.
АРЫС – ЕЛДІК НАМЫС
– Биыл 24 маусымда Арыс қаласында төтенше жағдай болғанын білесіздер. Осындай қиын сәтте Қазақстан халқы елдігі мен бірлігін көрсете білді. Ел Президенті Қасым-Жомарт Тоқаев қаланы жедел қалпына келтіру жөнінде тапсырма берді. Осыған сәйкес, арыстықтарға Үкімет тарапынан да, халық тарапынан да үлкен көмек көрсетілді, көрсетіліп те жатыр. Премьер-министр Асқар Маминнің тапсырмасына сәйкес, Арыс қаласын шұғыл түрде қалпына келтіру үшін қала аумағын 17 секторға бөліп, республикалық маңызы бар қала мен облыс әкімдіктері тарапынан тиісті жұмыстар жүргізілді, – деді Ө.Естайұлы.
Айта кету керек, Арыс қаласында құрылыс қарқынды жүрді. Еліміздің 14 облысы мен Нұр-Сұлтан, Алматы және Шымкент қаласы бірігіп, апаттан зақым келген үйлерді қысқа мерзім ішінде қалпына келтірді. Арыс қаласында жалпы 8 637 тұрғын үй (8 534 жеке, 103 көпқабатты тұрғын үй) нысаны болса, 24 маусымнан бері 7 163 тұрғын үй жөнделіп, 470 үй қайта салынған. Одан бөлек, қаланың инфрақұрылымы да күрделі жөндеуден өтті. Қала көшелеріндегі ақауларды жою бойынша атқарылған іс-шаралар аясында жалпы ұзындығы 59,7 шақырымды құрайтын көшелерге жөндеу жұмыстары жүргізілген. Жалпы 68 әлеуметтік нысанның жөндеу және құрылыс жұмысы қолға алынып, бүгінге дейін 62-сі пайдалануға беріліпті.
ҚЫЛМЫСПЕН КҮРЕС – ҚОҒАМ МІНДЕТІ
Баспасөз конференциясында журналистер тарапынан қойылған сұрақтың көбі өңірдегі қылмыс оқиғаларына және жемқорлық әрекеттерге байланысты болды. Әсіресе, Түркістан облысындағы Абай ауылында осы жылдың көктемі мен жазында болған жантүршігерлік оқиғалардың (адам зорлығы) соңы не болғаны сұралды. Ө.Шөкеевтің айтуынша, қазіргі күні құқық қорғау органдары аталған іспен айналысып жатыр. «Орын алған қылмыстық іспен арнайы мекемелер айналысады, оған бөгет жасауға құқымыз жоқ. Біздің міндет – алдағы уақытта ондай оқиғаларға жол бермеу, алдын алу. Қазір әр ауданда, ауылда білікті мамандар жұмыс істеп жатыр» деді әкім.
Кездесу соңында Өмірзақ Шөкеев журналистер мен қоғам белсенділерін оңтүстік өңірге, Түркістан облысына қатысты қалыптасып қалған қасаң түсініктен арылуға шақырды. «Біздің облыс – тұрғындары тығыз қоныстанған облыс. Екі миллионнан аса адамы бар аймақтың телісі де, тентегі де болары анық. Бүгінгі күні қылмыс та, жемқорлық та еліміздің әр аймағында кездеседі. Ол жалғыз оңтүстікке тән мәселе емес. Мен өзім де осы өңірдің тумасымын. Біздің бала кезімізде қазіргідей жантүршігерлік оқиғалар болмайтын. Меніңше, бұл – тұтас қоғамға кейін келіп қосылған «теріс әдеттер». Демек, онымен күресу – барлығымызға міндет» деді Ө.Шөкеев.