Жазушы, Мемлекеттік сыйлықтың иегері Дулат Исабековтің шығармашылығына арналған Назарбаев университетінің оқытушылары мен студенттері ұйымдастырған «Екі жиырма» атты кеші өтті.
Кештің бұлай аталуы да бекер емес: бұл Д.Исабековтің 1983 жылы жарық көрген жинағының атауын және биыл күнтізбемізде екі жиырманың қатар келуін меңзеп тұр. Іс-шара онлайн форматта Zoom қосымшасы арқылы жүзеге асты. Кездесу барысында әлемдік ахуал, қазақ әдебиетінің келешегі төңірегінде ой бөлісті.
Жазушы жер бетін дүр сілкіндірген тарихи тұлға Шыңғыс ханға «сен» деп сөйлеген жалғыз адам – сүйген жары Бөрте жайлы пьеса жазуды бастағанын жеткізді. Д.Исабеков: «Мен осы індет кезінде біршама істер атқаруыма мүмкіндік туды. Қазақ әйелінің бейнесін сомдауда Тұмар ханша, Ұмай ананы жақсы білеміз. Шыңғыс ханның әйелі Бөртені жан-жақты зерттеп, жуықта ғана пьеса жазып бітірдім. Бұл жаңалығымды сіздерге айтып отырмын», – деді.
Желі арқылы Назарбаев университеті, Еуразия гуманитарлық институты, Ахмет Байтұрсынұлы атындағы Қостанай мемлекеттік университеті, Сүлеймен Демирел атындағы университеттің оқытушылары мен студенттері жазушының әңгімесін тыңдап, сауалдарын қойды.
Әдеби басқосуда жазушының бірнеше туындысы бойынша студенттердің ой-пікірлері айтылды. Қаламгер шығармаларынан үзінділер келтіріліп, жұмбақ ретінде ойнатылды. Д.Исабековтің өмірі және шығармашылық жолы туралы бейнероликтер көрсетілді.
Кеш соңында кафедра меңгерушісі Юлай Шәмілұлы мен ғалым ұстаздар Айгүл Ісімақова, Гүлтас Құрманбай және Жанар Әбдіғаппарова ел сыйлаған қаламгерге осы бір әсерлі кездесуге қатысып, өз ойларын ортаға салғаны үшін алғысын жеткізді. Сондай-ақ студент жастар да жазушыға ізгі тілектерін арнады.
Ал жаңа ғасырдың жастарымен жүздескен Дулат Исабековтің өзі білім жолында жүрген өскелең ұрпақтың әдебиетке, рухани байлыққа қызығушылық танытып отырғаны үшін зор ризашылығын білдірді.
