Елбасы жігерлі де жасампаз, білгір әрі білікті жас ұрпақтың жетекші өкілдерімен жүздесті. Назарбаев орталығында өткен кездесуге Тұңғыш Президент қоры сыйлығының әр жылдағы лауреаттары, мәдениеттен бастап жоғары технологияларға дейінгі әр саладағы үздік жобалар байқауларының жеңімпаздары, еліміздегі талантты жастар қатысты.
Өрелі, өміршең істердің бастауында тұрар жастар Нұрсұлтан Назарбаевқа өздерінің жетістіктері мен түрлі салалардағы жаңалықтары туралы айтып берді.
Өз сөзінде адам капиталын дамытудың маңызына тоқталған Қазақстанның Тұңғыш Президенті жаһандық дамудың заманауи сын-қатерлері мен әлемдік үрдістерді жастардың қаперіне салды.
Сонымен бірге Н.Назарбаев оларға жас азаматтарға одан ары өсуі үшін тең жағдай жасау бағытында қолға алынып жатқан шаралар туралы әңгімеледі.
– Жастар жылы аясында талантты және қабілетті жас қазақстандықтарды қолдауға бағытталған «Ел үмiтi» бастамасын ұсындым. Бұл бастаманың операторы – Тұңғыш Президент қоры. Ол мемлекеттік органдармен тығыз байланыста жұмыс істеуде. Қазір қор кең ауқымды трансформация кезеңін бастан өткеруде. Ол білім беру, әлеуметтік даму және жастар бастамаларын кешенді қолдайтын құрылымға айналады, – деді Елбасы.
Жүздесу барысында ол «Ел үмiтi» бастамасы аясында алда атқарылатын жұмыстардың маңызды бағыттарын тілге тиек етті.
– Біз оқушылардың қабілеті мен кәсіби бейімділік-бағдарланушылығын анықтайтын кешенді жүйе құрамыз. 2020 жылы барлық өңірде мектеп қабырғасындағы балалардың қабілеті мен кәсіптік бағдарын ерте айқындайтын арнайы орталықтар ашылады. Оларда дарынды балалардың қабілетін диагностикалаудың үздік әлемдік тәжірибелерге негізделген заманауи әдістері қолданылатын болады, – деді Тұңғыш Президент.
Сондай-ақ Елбасы жақын арада елордада болашақ мамандықтардың арнайы орталығы құрылатынын хабарлады. Бұған қоса, озық білім беру ресурстарына қолжетімділікті қамтамасыз ететін ақпараттық тұғырнама түзіледі.
Бұдан бөлек, Нұрсұлтан Назарбаев ауыл мектептерін қолдау бойынша жоспарланған шараларды атап өтті. Мәселен, Тұңғыш Президент қоры бағдарламасы аясында «Мың бала» олимпиадасы ұйымдастырылады. Оның қорытындысы бойынша ауылдағы білім ордаларындағы шамамен 1 000 үздік оқушы білімін талантты балаларға арналған «Дарын» мектептерінде жалғастыруға мүмкіндік алады.
Арнаулы бағдарламаға сәйкес ауыл мектептеріне жаңғырту жүргізілмек. Бірінші кезеңде дәл осы бағдарламаға 2020 жылы 14 мектепті іріктеп алу жоспарлануда.
– Бағдарлама аясында осы оқу орындарының педагогтары республикалық интеллектуалдық мектептер мен жетекші халықаралық университеттерде оқытудың заманауи әдістерін меңгереді, – деді Тұңғыш Президент.
Ол жас көшбасшылар командасын қалыптасу процесіне де ерекше мән бере кетті.
– Біз көшбасшылық қасиеттерді және мақсаткерлікті дамытуға, өскелең ұрпақ бойында патриотизмді күшейтуге бағытталған арнайы жобаны іске қосып отырмыз. Жастарды өзін-өзі дамытуға және табысты болуға ынталандыратын осы тәріздес бағдарламалар әлемде өте танымал. Жаңа бағдарлама 7 бағыттан тұрады, бұлар: физикалық даму; тұлғалық күшті қасиеттерді ұштау; кітап оқу; еріктілердің қызметіне атсалысу; экспедициялар мен саяхаттарға қатысу; ұлттық мұраны сақтау және тәжірибе жинау, – деді Н.Назарбаев.
Елбасы экономиканың түрлі салаларына қажетті майталман мамандар даярлаудың маңызына назар аударды.
– Басты талап – үздік білім мен әлемдік жетекші компанияларда жиған тәжірибе ғана емес, сонымен қатар командада жұмыс істей білуі, күрделі міндеттер үшін батыл жауапкершілік алуы және жұмысты соңына дейін жеткізуі. Бағдарлама бойынша іріктеуден өткен әр маман өзгерістерді басқару менеджері деңгейіне дейін оқытылады, – деді ол.
Соңында Нұрсұлтан Назарбаев барша қазақстандықтарды «Ел үміті» бастамасын іске асыруға белсене қатысуға шақырды.
– Бұл бастамаға бүкіл қоғам, соның ішінде аға буын өкілдері бір кісідей атсалысса, ол табысты әрі нәтижелі боларына сенімдімін. Ұстаздар қауымы мен шығармашылық интеллигенцияны осы жобаларды қолдауға шақырамын! – деді Қазақстанның Тұңғыш Президенті.
Біраз уақыттан бері Елбасы қорының қолдауы арқасында қазақстандық жас ғалымдар, инноваторлар, мәдениет қайраткерлері, әлеуметтік жобаларды әзірлеуші жастар, еліміздің әр өңіріндегі дарынды балалар жасампаз төл идеяларын жүзеге асыруда.
Қор жас ұрпақты түрлі байқаулар мен жобалар ұйымдастыру арқылы демейді. Мәселен, 2008 жылдан бері талантты жас қазақстандықтар арнайы жүлдемен жыл сайын марапатталады. Бүгінге дейін Тұңғыш Президент қорының осы сыйлығына 258 лауреат ие болды.
Қор жас стартапшылардың инновациялық жобаларына грант пен білім беру стипендиясын да ұсынады.
Шара барысында лауреаттар Елбасын идеяларымен таныстырып, жүргізіп жатқан жұмыстары жайында баяндады, болашаққа жоспарларымен бөлісті. Мысалы, жас ІТ құрастырушы Бақытжан Байжикеновтің жобасы бағдарламалауға оқытатын онлайн мектепті құруды қарастырады. Онда білім алу үшін сан алуан құрал, нақтылай кетсек, видео дәрістер, кітаптар, тәжірибелік сабақтар, вебинарлар мен конференциялар пайдаланылады. Қазір онда оқып жүрген білім алушылардың саны 2 мыңнан асыпты.
Тағы бір жас инноватор Тимур Рыспеков Тұңғыш Президент қоры грантының иегері ретінде АҚШ-тағы NASA International Space Apps Challenge байқауында командасымен бірге бірінші орынды жеңіп алғанын жеткізді. Жер мен ғарышты зерттеуге бағытталған халықаралық жарыста Тимур өз тобымен бірге кездейсоқ сандардың кванттық генераторын әзірлеп шықты. Фотондардың түрлі сипаттамасы негізінде құрылғы кездейсоқ деректерді өңдейді, ары қарай бұл шешімді дербес мәліметтерді қорғау үшін криптографияда, қаржылық тәуекелдерді алдын ала болжауға қолдануға болады екен. Өнертабыс түрлі дәрі-дәрмек жасау, тау-кен өнеркәсібі салаларына да бейімделуі мүмкін.
Өз идеясын табысты жүзеге асыра алғандардың арасында Елбасы қорының лауреаты Нұрбек Нәдіров бар. Ол Ана мен бала ұлттық ғылыми орталығында травматолог-дәрігер, ортопед болып қызмет атқарады. Оның идеясы балалардың омыртқасының қисаюын транспедикулярлы арқалық жүйесі көмегімен үш жазықты хирургиялық түзетудің бірегей отандық тәсілін әзірлеумен байланысты.
Елбасымен кездесу барысында «Ел үміті» бастамасы аясында тағайындалған «Ел мақтанышы» сыйлығы алғаш рет табыс етілді. Бұл сыйлық мектеп оқушылары мен ұстаздарды жаратылыстану ғылымдарында жоғары нәтижеге жетуге ынталандырады. Осы мақсатта жүлде математика, химия, физика, информатика, биология және география бойынша халықаралық беделді олимпиадалардың жеңімпаздарына беріледі.
Бұл ретте халықаралық біріншілікте алтын медаль иеленген оқушы мен оны дайындаған ұстазына «Ел мақтанышы» аясында 2 миллион теңге сыйақы табысталады. Күміс жүлде үшін әрқайсына 1 млн теңгеден, ал қола медальға 500 мың теңгеден ұсынылады.
Осылайша, Тұңғыш Президент Нұрсұлтан Назарбаев университет студенті Б.Сардарбеков пен оның ұстазы, информатикадан Қазақстан командасының жаттықтырушысы Т.Сатылханов екеуіне 2 млн теңге соманың сертификатын тапсырды. Жас дарын бұл марапатқа биыл Әзірбайжанда өткен информатика бойынша халықаралық Олимпиадада жеңіс тұғырына көтерілуіне байланысты лайық деп танылды.
Жүздесуге қатысушылар төл идеяларының өмірге жолдама алуына көмек көрсеткені және жарқын істерге ұмтылысын қолдағаны үшін Елбасына алғыс жаудырды.
Осы күні Нұрсұлтан Назарбаев Qazaqstan орталық концерт залына барып, Тұңғыш Президент күніне арналған концертті тамашалады. Концерт басталмас бұрын ол «Тарихи таңдау» көрмесін аралап көрді. Экспозициялар Елбасы кітапханасының мұражайлық коллекциясындағы архивтік материалдар мен бірегей заттар кешенінен тұрады. Көрмеге Н.Назарбаевтың жеке кітапханасынан 145 кітап, бұдан өзге 220 экспонат қойылды.
Ал концертте Мемлекеттік күзет қызметінің Президенттік оркестрі және отандық эстрада жұлдыздары өнер көрсетті.