Карантин талаптарын сақтай отырып, ZOOM платформасы арқылы өткен қабылдауда тұрғындар баспана, жұмыспен қамту, әлеуметтік көмек, жер мәселесін заңдастыру секілді көкейкесті сауалдарын Қызылорда облыстық «Nur Otan» партиясы филиалының төрағасы, облыс әкімі Гүлшара Әбдіқалықоваға тікелей жеткізді.
І топ мүгедегі Вениамин Иванов 10 жылға жуық уақыттан бері пәтер кезегінде тұр. Ол Қызылорда қаласынан өзінің кезегі бойынша пәтер алу мәселесі тез шешілсе дейді. Ол үшін екіжақты әріптестік арқылы мүгедектерге тұрғын үй беру мәселесі бойынша арнайы бағдарлама жасалып, ипотекалық пәтер алуға мүмкіндік жасалса, әсіресе екінші санаттағы үй алуға мүмкіндік берілсе деген ұсынысын алға тартты. Облыс басшысы екіжақты әріптестік арқылы мәселенің қаралуын қолдайтынын білдіріп, бұл бағытта жұмыс істелетінін айтты. Ал ІІ топ мүгедегі Александр Ульяновский электрлік қоларбаға таңылғандықтан оны қуаттағыш батареялар мен ортопедиялық жастық қажет екенін айтты. Сонымен қатар медициналық мекемелерге, сауда, қызмет көрсету орталықтарына мүмкіндігі шектеулі азаматтар үшін емін-еркін кіріп шығуына жағдай жасалса дейді. Батарея және ортопедиялық жастықпен қамтамасыз етуге қатысты өзге өңірлердің тәжірибелері зерделеніп, мүмкіндіктер жасалатын болды. Тиімді ортаға қол жеткізу мәселесі бойынша оған тиісті органдармен бірлесіп жұмыс істеу ұсынылды. Қала тұрғыны Зауре Уксимбаева І топтағы мүмкіндігі шектеулі азаматтар атынан өтініш айтты. Оның айтуынша, 2016-2017 жылдары облыста мүмкіндігі шектеулі 33 адам КИК бағдарламасы арқылы ипотекалық несиемен үй алған. Бүгінде ипотекамен үй алғандарға 80 пайыз субсидия беріліп жатыр екен. Алайда осы жеңілдік жоғарыдағы үй алған азаматтарға қаралмаған, осыған ықпал жасалуын сұрады. Мәселе, тиісті министрліктер арқылы зерттелетін болды. Қабылдауда болған зейнеткер Күләш Алматшаева Қызылорда облысына еңбегі сіңген, танымал радио дикторы, «Сыр-Сұлу» ән-би ансамблінің жетекші-режиссері, «Қызылорда вальсі» әнін алғаш орындаушы, ағасы Сәбит Жаңабаевқа өзі туып-өскен Қармақшы ауылынан немесе қаладан көше атауын беруді сұрады. Өтініш иесіне ереже баршаға ортақ екені, мәселе тиісті комиссиялар тарапынан зерделеніп барып шешілетіні түсіндірілді. Жалпы, қабылдауға келген азаматтардың барлығының ұсыныс-тілегін мұқият тыңдаған облыстық филиал төрағасы, облыс әкімі Гүлшара Әбдіқалықова арыз-шағымдар мен ұсыныстың орындалуын қамтамасыз ету үшін тиісті орган басшыларына нақты тапсырма берді.Әбілмансұр ЖАСАН