Ауыл шаруашылығы министрлігінің мәліметінше, биыл жануарлар мен құстарға 150 млн-нан астам екпе салынады.
Олардың айтуынша, жануарлардың аса қауіпті ауруларының алдын алу және диагностикалау жөніндегі ветеринарлық іс-шаралар жоспарына сәйкес, 2021 жылы жануарлар мен құстарды вакциналау бойынша 151 млн-нан астам манипуляция, сондай-ақ 68 млн-нан астам диагностикалық зерттеу жүргізілмек. Осылайша, Қазақстан аумағын басқа мемлекеттерден жануарлардың жұқпалы және экзотикалық ауруларының таралуынан қорғап, ветеринарлық-санитарлық қауіпсіздікті қамтамасыз етеді. Халықтың денсаулығын жануарлар мен адамға ортақ аурулардан қорғау үшін республиканың ветеринарлық қызметі ветеринарлық-профилактикалық іс-шара ұйымдастырып, малды уақытылы диагностикалау және вакциналау жұмысын жүргізеді. Ауыл шаруашылығы министрлігінің Ветеринарлық бақылау және қадағалау комитеті осыған байланысты жыл сайынғы иммундық алдын алу іс-шарасын жүргізеді. Ол үшін сертификатталған ветеринарлық препараттармен қамтамасыз етпек. «Халықаралық Эпизоотиялық бюроның тізіліміне түрлі аурулар мен инфекциялардың 88 түрі енгізілген. Қазақстандық тізілімде тек 68 түрі тіркелген. Олар елімізде Кеңес Одағы кезінен бері келе жатыр. Қазір оның 45 түрі бойынша эпизоотиялық жағдайы тұрақты. Ал 23 түріне диагностика және вакциналау бойынша арнайы ветеринарлық-профилактикалық іс-шара жүргізіліп жатыр. Оның ішінде жануарлар мен құстарды вакциналау бойынша 151,1 млн манипуляция, сондай-ақ 68,1 млн диагностикалық зерттеулер жүргізу жоспарланып отыр» деп жазылған хабарламада. Министрліктің мәлімдеуінше, тиісті жұмысты жергілікті атқарушы органдар жанындағы мемлекеттік ветеринарлық ұйым биыл ақпан-наурыз айларында бастайды.Айбике ЖАНАСЫЛ