Карантинде үйінде отырған қазақстандықтар нан, тоқаш, торт және ұннан жасалған басқа да өнімдерді көп тұтыныпты. Мысалы, 2020 жылы Қазақстанда ішкі нарықта тұтыну үшін барлығы 650 мың тонна нан өндірілді. Бұл туралы Ауыл шаруашылығы министрлігі хабарлады. Тамақ өнімдерінің жекелеген түрлерін өңдеу мен өндіру көлемі артқан. Өйткені тұтыну көрсеткіші өсті.
Коронавирус пандемиясы жайлаған бір жыл ішінде Қазақстанда бидай глютені өндірісі 4,3 мың тоннадан 6,1 мың тоннаға дейін артып, шамамен 42%-ға ұлғайды. Өңделген күріш өндірісі де 166 мың тоннадан 200 мың тоннаға дейін жетіп, 20%-ға өсті. 2019 жылмен салыстырғанда былтыр крахмал өндірісі 32,6 мың тоннадан 37,3 мың тоннаға, макарон өнімдері 168,3 мың тоннадан 178,8 мың тоннаға, кондитерлік өнімдер 237,9 мың тоннадан 244,2 мың тоннаға, ұн 3,27 млн тоннадан 3,32 млн тоннаға, маргарин 62,4 мың тоннадан 63 мың тоннаға дейін өскен. Яғни, карантин жұртшылықтың тамақ тұтынуына тікелей әсер еткені байқалады. Айтқандай, 2019 жылы 644,6 мың тонна піскен нан өндірілген екен. Алайда қайта өңделген және консервіленген жемістер мен жаңғақтар өндірісі 30%-ға (6,7 мыңнан 4,7 мың тоннаға дейін), жеміс және көкөніс шырындары – 21%-ға (74,8 миллионнан 59,2 миллион литрге дейін), тазартылған және тазартылмаған өсімдік майы өндірісі 2,4%-ға (475-тен 464 мың тоннаға дейін) төмендеді.Е.СЕНБАЙ