«Nur Otan» партиясы Шымкент қалалық филиалы Шымкент қаласының Азаматтық Альянсы және «Шымкент қайырымды қала» әлеуметтік даму корпоративтік қоры үш жақты ынтымақтастық пен серіктестік жөніндегі меморандумға қол қойды.
Енді тараптар өзара тең құқықтарын басшылыққа ала отырып, өз құзыры шеңберінде қаладағы әлеуметтік мәселелердің оңтайлы шешілуіне атсалысатын болады. Жиында сөз сөйлеген «Nur Otan» партиясы Шымкент қалалық филиалы төрағасының бірінші орынбасары Жанар Бектаева осыған дейін бірлескен жұмыстың нәтижелерімен бөлісіп, осы үш жақты ынтымақтастықтың көздеген мақсаты партияның «Бақытты отбасы», «Кедергісіз келешек» және «Ардагерлерді ардақтайық» жобалары аясында әлеуметтік мәселелер негізінде қоғам өмірін жақсарту екенін айтты. Айта кетейік, «Шымкент қайырымды қала» әлеуметтік даму корпоративтік қоры пандемия кезінде «Nur Otan» партиясы Шымкент қалалық филиалымен бірлесе отырып, қаламыздағы 13 мыңнан астам аз қамтылған және көпбалалы отбасын бірреттік азық-түлік топтамасымен қамтамасыз еткен болатын. Ал «Шымкент қаласының Азаматтық Альянсы» қауымдастығымен бірлескен жұмыс нәтижесінде азаматтық қоғамның жұмысын үйлестіру, мемлекеттік жастар мен отбасылық саясаттың ішкі саяси тұрақтылығын қамтамасыз ету мақсатында бірнеше іс-шара өткізілді. «Nur Otan» партиясы Шымкент қалалық филиалы төрағасының бірінші орынбасары Жанар Бектаева, «Шымкент қайырымды қала» әлеуметтік даму корпоративтік қорының директоры Дәуренбек Құрбаниязов және «Шымкент қаласының Азаматтық Альянсы» қауымдастығының президенті Жұмағали Білісбековтің меморандумға қол қою рәсімін қорытындылай келе тараптар бірлескен жұмысқа жауапкершілікпен қарап, кез келген өзара қолдауға ашық екенін айтты.Әбілмансұр ЖАСАН