Алматы ботаникалық бағы Білім және ғылым министрлігінің қарамағынан алынып, Экология, геология және табиғи ресурстар министрлігі Орман шаруашылығы және жануарлар дүниесі комитетіне өтті. Біраздан бері ботаникалық бақ төңірегінде түрлі қауесет айтылып, тіпті оны Алматы қаласы әкімдігінің қарамағына өте ме деген де әңгіме тараған.
Экология, геология және табиғи ресурстар министрлігі Орман шаруашылығы және жануарлар дүниесі комитетінің баспасөз хатшысы Сәкен Ділдахмет «Алматы қаласының Бас ботаникалық бағы еліміздің айрықша қорғауындағы табиғи аумақ, ол Білім және ғылым министрлігі Ғылым комитетінің ведомстволық бағынышты ұйымы болып саналады. Ботаникалық бақты Алматы әкімдігінің қарамағына өткізу мәселесі қойылған емес. Сәйкесінше, бұл жер айрықша қорғаудағы табиғи аумақ тізімінен алынбайды» деп жауап берген болатын. Енді Бас ботаникалық бақтың Экология, геология және табиғи ресурстар министрлігі құзырына өткені мәлім болды.
Қазір ботаникалық бақта қайта жаңғырту жұмыстары жүргізіліп жатыр. 108 гектардан астам аумақты алып жатқан бақтың тағдыры өткен жылы қала тұрғындарын біраз алаңдатқан еді. Оның болашағы жайлы бірнеше ай бойы талқылау болған. Жаңарту мәселесі жайлы әңгіме қозғалғанда тұрғындардың көпшілігі бақ жөндеуден өткенде коммерциялық мақсаттарға беріліп, кафе-мейрамханалар салынады деп алаңдады. Ағаштар кесіліп, жер телімі жекеге өтеді деген де қауіп айтылды. Ақыр соңында бірнеше ай бойы талқыланған жобаның концепциясын Қоғамдық кеңес мүшелері мақұлдады. Қоғамдық экологиялық тыңдауда мамандар бақтың инфрақұрылымын қалпына келтіру, оның ішінде жылу, электр мен кәріз жүйесін реттеу жайын да талқылаған еді. Жаңғырту жұмыстары аяқталған соң ботаникалық бақ қайта түлемек. Баққа үш жақтан кіретін қақпа салынып, қала тұрғындары мен қонақтарының демалуына жайлы жағдай жасалады. Жасыл желектерді сақтауға, сондай-ақ бұрынғыдан да көріктендіре түсуге барынша әрекет етілмек. Жолдар жөнделеді. Жарық шамдар мен бейнебақылау орнатылады. Павильон қойылып, билет кассалары, шай ішетін орын салынады. Әбден ескірген қоршаулары жаңасымен алмастырылады. Бақтың шығыс жақ беті 3 метрлік биік бетонмен қоршалмақ. Дәл осы қоршаудың арғы бетінде студенттер жатақханасы орналасқан. Төмен қоршаудан қоқыс лақтыру осы күнге дейін жаман әдетке айналғаны жасырын емес. Бұған дейін бақтағы ағаштарды сумен қамтамасыз ету де үлкен мәселе болып келген. Алдағы уақытта бұл мәселе де шешімін таппақ. Ботаникалық бақты жаңарту жұмыстарына бюджеттен қаражат шығындалмайды.
Алғашында ботаникалық бақты 2019 жылдың 1 шілдесінен 1 қарашасына дейін қайта құрудың қарбалас сатысының кезеңінде келушілер үшін жабу туралы шешім қабылданған. Өйткені баққа топ-топ болып қыдырып келетін балалардың қауіпсіздігін қамтамасыз ету көзделді. Ықтимал жазатайым жағдайлардан сақтану үшін осындай қадам жасалды. Бастамашылар қайта құру бойынша жұмыстардың ашықтығы мен олардың атқарылуы туралы көпшілікті жүйелі түрде хабардар етіп отыр.
Алдағы уақытта шаһар тұрғындары мен қонақтары ботаникалық бақта жайлы уақыт өткізе алады. Отандық ғалымдардың дендрология, ботаника және фитоинтродукция саласындағы жетістіктерін тамашалауға мүмкіндік туады. Бұл бақ қаланың көне жәдігерінің бірі деуге негіз бар. 1932 жылы негізі қаланған бақта осыған дейін екі рет қайта жаңғырту шаралары жүргізілген. Қайта жаңғыру жұмыстары көктемде толығымен аяқталып, тұрғындар мен қала қонақтарына есігін айқара ашпақ.
Гүлнар ЖҰМАБАЙҚЫЗЫ