Атырауда жылу құбыры үстіне тастап кеткен шақалақтың анасы табылды. Батыс Қазақстаннан жолға шыққан жас келіншек Атырауға жүктілігін жасыруға келген болып шықты. Ол баланы үйде өзі босанып, далаға тастаған.
Жарық дүниені көре сала тағдыры елді алаңдатқан шақалақты өлімнен сақтап қалған қала тұрғыны Надежда Палий болса, оған Ұлдана деп есім қойып, денесін қарыған суықтан арашалау үшін күрескен облыстық балалар ауруханасының жансақтау бөлімшесінің меңгерушісі Ғалым Ембергенов. Салмағы –3 келі 340 гр, бойы 50 см қыз баланың жағдайы тұрақты.
Біреуге зар болған баланы далада тауып алған оқиға дерегі тіркелген сәттен-ақ құзырлы орган қызметкерлері шақалақтың анасын іздеуге жұмылды.
Атырау облыстық полиция департаменті баспасөз қызметінің хабарлауынша, криминалдық полиция және жедел басқару орталығының қызметкерлері бірлесіп жүргізген іздестіру шаралары нәтижесінде бейнекамералардың көмегімен Орал қаласының тұрғыны 1998 жылғы азамат ұсталды.
Атырауға жүктілігін жасыру мақсатында келіп, жалдаған үйде босанған келіншек шақалақты жылу құбырлары жүйесінің үстіне тастап кете барған. Қылмыстық кодекстің 119-бабы 1-бөлігімен, яғни «Қауіпті жағдайда қалдыру, өміріне немесе денсаулығына қауіпті жағдайдағы және сәбилігіне қарай немесе өзге де дәрменсіз күйі салдарынан өзін-өзі сақтап қалу шараларын қолдану мүмкіндігінен айырылған адамды көрінеу көмексіз қалдыру» бойынша сотқа дейінгі тергеп-тексеру амалдары жүргізілуде.
Анасын іздеп іңгәлаған сәбидің тағдырына алаңдаған кім бар?!.
Т.ЖҰМАБЕКҚЫЗЫ