Совет дәуірінде көңілден көмескі тартқаны болмаса, Алтын Орда кезеңіндегі даңқты тарихымыз халық санасында айқын таңбаланған. Ұлық Ұлыстың негізін қалаған Бату ханды қазақтар «Садағын сағымға ілдірген Сайын хан» деп әспеттеген. Яғни, қазіргі тәуелсіз Қазақстан Алтын Орданың тікелей мұрагері деген атқа әбден лайық.
Күні кеше Үкімет қаулысымен Алтын Орданың 750 жылдық мерейтойын өткізу жөніндегі іс-шаралар жоспары бекітілді.
Жоспарға 40 түрлі іс-шара енген. Оның ішінде Сарайшық қаласын қалпына келтіру бойынша археологиялық жұмыстар жүргізуге 2020 жылға – 29,7 млн теңге, 2021 жылға – 21,1 млн теңге, 2022 жылға 19,2 млн теңге бөлінуі мүмкін. Ал «Жошы хан» кесенесінің жанында туристік кешен салуға 800 млн теңге қажет. Қазақстан Ұлттық музейінде «Алтын Орда және Қазақ хандығы залдары» экспозициясын құруға – 175,1 млн теңге, «Ұлытау» ұлттық мұражай-қорығын жаңғыртуға – 330 млн теңге, Ұлытау ауылы маңында туристерді қабылдайтын этноауыл құруға 350 млн теңге жұмсалмақ. Сондай-ақ мерейтой шеңберінде Алтын Орда, Жошы хан, Алаша хан сынды тарихи тақырыптарға деректі фильмдер циклі түсіріледі.
Жалпы, «Ұлық Ұлысты» тойлауға қажет іс-шаралар жоспарын жүзеге асыруға 3,5 млрд теңге қарастырылған.
Мемлекет басшысы Қасым-Жомарт Тоқаев Қазақстан халқына арнаған Жолдауында: «Алтын Орданың 750 жылдығы туристердің назарын тарихымыз бен мәдениетімізге, жеріміздің табиғатына аудару тұрғысынан тойлануы керек» деген еді. Рас, географиядан аз-маз хабары бар шетелдіктер Қазақстанды байырғы көшпелілер елі деп қарастырады. Біз осы ерекшелікті тиімді пайдаланып, өзімізді ежелде дүниені дүбірлеткен қағанаттардың қара шаңырағы ретінде көрсетуіміз керек.
Ұлттық экономика министрлігі Статистика комитетінің мәліметіне сүйенсек, былтыр Қазақстанға келіп кеткен туристердің 23,1 пайызы елімізді қонақжай халқымен, 18,1 пайызы – тамаша табиғатымен, 16,2 пайызы – саяхатшыларға қауіпсіздігімен, 8,2 пайызы – дәмді асханасымен, 7,1 пайызы «Ұлы Дала» ұғымымен байланыстырған екен. Алтын Орданың 750 жылдығын абыроймен атқарып шықсақ, соңғы тармақты 70 пайызға да жеткізетін күн туар.
Еркебұлан НҰРЕКЕШ