Футболдан ел біріншілігінің ІV туры аясында төрт ойын өтті. Алдымен «Тараз» өз алаңында қарағандылық «Шахтер» командасын қабылдады.
Алаң иелері қарсыластар қақпасына жауапсыз төрт гол соқты. Стандартты жағдайды оңтайлы пайдаланған Фейт Фрайдер Обилор ойынның 29, 44-минутында мергендігімен көзге түсті. Ал кездесудің екінші кезеңінде «Тараз» сапынан Педро Эужениу көзге түссе, ойын аяқталар тұста Ненад Адамовичтың қанжығасы майланды. Осылайша, тараздықтар 4:0 есебімен жеңіске жетті. Осы жеңісінен кейін «Тараз» турнир кестесінде он ұпаймен көш бастады. Әзірге әулиеаталықтардың еншісінде екі жеңіс, екі тең ойын бар. ІV турдың екінші ойыны Оралда өтті. Жергілікті «Ақжайық» пен Петропавлдың «Қызылжары» өзара кім мықтыны анықтады. Қонақтар бір доп айырмасымен жеңіске жетіп, сырт алаңда үш ұпайға ие болды. Ал қызылордалық «Қайсар» өз алаңында «Каспийді» 2:1 есебімен жеңді. Алматы қаласындағы «Жас қыран» стадионында «Ақтөбе» мен Шымкенттің «Ордабасы» командалары шеберлік байқасты. Бұл ойында барлығы 8 гол соғылды. Тартысты ойын 4:4 есебімен аяқталды.Әбілмансұр ЖАСАН