Түркістан облысының аудан, қалаларында «Nur Otan» партиясының бастауыш партия ұйымдарының жиналысы өтті. Жиындарда бастауыш партия ұйымдарының 2019-2020 жылдары атқарған жұмыстары сараланып, төрағалары сайланып, аумақтық партия филиалының конференцияларына қатысатын делегаттар анықталды.
Сондай жиналыстың бірі Ордабасы ауданы Шұбарсу ауылында ұйымдастырылды. 563 мүшесі бар «Шұбарсу» бастауыш партия ұйымының жиналысында «Nur Otan» партиясы Ордабасы аудандық филиалы төрағасының бірінші орынбасары, аудандық мәслихат депутаты Әлиасқар Бердімұрат бірқатар мәселені қозғады. Ол сайлаушылар алдындағы уәделерді толық орындау, Жол картасын жүзеге асыру басты міндет екенін жеткізді. – Биыл өткен сайлаудағы жеңіс – елдің партияға деген сенімінің көрінісі. Еліміздегі барлық аудан, қалада, ауылдарда өкілдіктері бар жалғыз саяси күш – «Nur Otan». Бүгінде партия фракциясының депутаттары тұрақты түрде қоғамдық қабылдау өткізіп, елдің талап-тілектері мен өтінішін орындауға күш салып жатыр. Сайлауалды бағдарламаны орындау бойынша жұмыс жалғаса береді, – деді ол. «Шұбарсу» бастауыш партия ұйымының төрағасы Сәрсенбек Қабылбеков Елбасы тапсырмасымен партияда болған өзгерістер мен тың бастамаларды жоғары бағалап, бұл бағытта да тиісті жұмыс жүргізілгенін атап өтті. – Шұбарсу ауыл округінде 30 мыңға жуық тұрғын бар. Бастауыш партия ұйымы тарапынан азаматтық қоғамды дамыту, елдің әлеуетін көтеру бағытында жұмыс атқарылып келеді. Елімізде төтенше жағдай жарияланғанда «Nur Otan» партиясы «Шұбарсу» бастауыш партиясы ұйымы аз қамтылған отбасыларға да баса назар аударып, демеушілер тауып, қайырымдылық іс-шарасын ұйымдастырды. Ауылдағы демеуші азаматтарымыз ондаған отбасына ет, азық-түлік таратты. «Nur Otan» партиясы Шұбарсу БПҰ және ауыл әкімдігі, демеушілер тарапынан 2020 жылғы наурыз-сәуір айларында аз қамтылған, тұл жетім балаларға, 1,2-топ мүгедектеріне, жалпы көмекке мұқтаж жандарға 3 млн 900 мың теңгенің көмегі көрсетілді. Сонымен бірге партияның «Қамқорлық» бағдарламасы аясында 31 отбасына тұрақты түрде қолдау көрсетіліп келеді, – деді БПҰ төрағасы. БПҰ-ның есебі тыңдалған соң БПҰ төрағасы мен орынбасары сайланды. «Nur Otan» партиясы аудандық филиалының конференциясына делегаттар анықталды. Жарыссөзге шыққан Б.Нұрлыбеков атындағы жалпы орта мектебінің директоры, аудандық мәслихатының депутаты Ж.Ақылбекова мен Шұбарсу ауылдың округі әкімінің орынбасары А.Бердешов партия ұйымының жұмыстарын оң бағалады. Бүгінде Ордабасы ауданы бойынша «Nur Otan» партиясының «Өзгерістер жолы: әр азаматқа лайықты өмір!» бағдарламасын орындау бағытында жұмыстар жүріп жатыр. Әрбір бағыттың орындалуы партияның бақылауына алынған. Сонымен бірге осы күні Түлкібас ауданындағы 584 мүшесі бар «Денсаулық» және 326 мүшесі бар «Отан» бастауыш партия ұйымдарында да есеп беру жиналысы өтті. «Nur Otan» партиясы Мақтаарал аудандық филиалының «Атакент», «Мақтаарал» және «Нұрлы жол» бастауыш партия ұйымдарында да онлайн режимде жиналыс өтіп, күн тәртібіндегі мәселелер қаралды. Түркістан облысында 244 бастауыш партия ұйымы бар. Ол ұйымға 80 мыңға жуық адам тіркелген. Бүгінде өңірдегі «Nur Otan» партиясының мүшелері Түркістан облысын дамыту жолында жемісті еңбек етіп жатыр.Әбілмансұр ЖАСАН