«Jas Otan» Жастар қанаты Ақтөбе облыстық филиалы жанынан құрылған бақылау комиссиясының мониторинг тобы М.Оспанов атындағы Батыс Қазақстан мемлекеттік медицина университетінің жатақханаларына рейд жүргізді.
«Jas Otan» Жастар қанаты Ақтөбе облыстық филиалының төрағасы Ануар Искарин бастаған мониторинг тобының құрамында облыстық мәслихаттың депутаты Жұлдыз Қожабекова, қалалық мәслихаттың депутаты Азамат Усимбеков және облыстық Жастар саясаты мәселелері жөніндегі басқармасының маманы Сұлтан Махин болды. Олар жатақханалардың жағдайын, материалдық-техникалық базасын, студенттерді орналастыру рәсімінің ашықтығын тексерді. Мониторинг тобының мүшелері аталған жоғарғы оқу орнына қарасты №4 жатақхананың материалдық техникалық базасы ескіргенін байқады. Оған қатысты жатақхана басшылығынан мән-жайды да анықтады. Елдегі қазіргі ахуалға байланысты көп студент қашықтан оқытылып жатқандықтан 179 орындық бұл жатақханада қазіргі күні 90 студент қана тұрып жатыр. Медуниверситетке қарасты №5 жатақхананың жағдайы мүлдем бөлек. Мұнда барлығы қазіргі заман талабына сай жаңа. Студенттердің тұратын бөлмелері жайлы, қажетті жабдықтармен жаңартылған. Асханалары ортақ болғанымен, шомылатын бөлмелер әр студенттің жеке бөлмелерінде. Сабақ оқуларына қолайлы интернет желісімен де қамтамасыз етілген. Әрбір студент санаулы уақытқа тысқа шықса да, рұқсат қағазы болмаса жатақханаға кіре алмайды. Ол жағы қатаң бақыланады. Айта кетейік, «Jas Otan» Жастар қанаты жанындағы мониторинг тобы Тұңғыш Президент – Елбасы Н.Назарбаевтың төрағалығымен 2019 жылдың 21 тамызында өткен «Nur Otan» партиясы Саяси кеңесінің кеңейтілген отырысында студеттердің жатақханаға орналасуы және студенттер үйінің арнайы талаптарға сай жұмыс істеу тәртібін қадағалау үшін құрылды. Жұмыс тобының негізгі мақсаты – жоғары және арнаулы орта оқу орындары жатақханаларына орналастыру рәсімінің ашықтығын қамтамасыз ету және бөгде адамдардың тұру мүмкіндігін болдырмау, жатақханалардың жағдайын тексеру.Әбілмансұр ЖАСАН