Елімізде ұн неге қымбаттады? Елімізде ұн бағасы 15 пайызға қымбаттаған. Ұнның келісі кей өңірлерде 360 теңгеге жетті. Соның салдарынан нан өнімдерінің бағасы да шарықтап бара жатыр. Қымбатшылық қыспаққа алды деген қараша бидай ұнын қабымен алуды ұмыттық деп қынжылады.
Ауыл шаруашылығы министрлігі отандық ұн өндірісінің көлемі ішкі нарықты қамтамасыз етуге жеткілікті екенін жеткізді. Алайда бағаны ауыздықтауға оның септігі тимей тұр, – деп хабарлайды КТК. Елімізде ұнның құны да өзге азық-түліктен қалыспай күннен-күнге қымбаттап жатыр. Өткен жылмен салыстырғанда ұн бағасы15 пайызға бір-ақ көтерілген. Бұл нан өнімдерінің бағасына да тікелей әсер етеді. Мәселен, Алматыда ең арзанының келісі 215 теңгеге жетті. Жоғарғы сұрыпты ұн бағасы, тіпті, 300 теңгеге дейін барады.
Самат Қабылбеков, Алматы қаласының тұрғыны:
– Ұнның өзі қазір 10 мың теңгеге жетті. Бұрын дүкеннен 7 мыңға алатынбыз. Қазір қабы 3-4 мыңға қымбаттап кетті. Бидай өзімізде егіледі. Білмеймін, енді. Әр дастарқанда тұратын тағам. Бәрі қымбаттады деп қымбаттата бергеннің қажеті жоқ. Республика бойынша ең қымбат ұн - Нұр-Сұлтан қаласында. Бас қалада ұнның келісі орташа 340-360 теңгеден сатылып жатыр. Елордалықтар қымбат бағаға көнуден басқа амал жоқ дейді. Таразда жұрт ұнды қабымен алуды ұмыттық деп отыр. Қымбатшылық қыспаққа алды деген жамбылдықтар ең қажетті әрі сұранысқа ие отандық өнімнің құны ай сайын көзалдымызда құбылады деп аң-таң.
Ғабит Ұлынбеков, Тараз қаласының тұрғыны:
– Бұрын мен қабымен алатынмын. Қазір осылай келімен алуға мәжбүрмін. Өткен айда ұн 700 теңге тұрған. Қазір мың теңге деп тұр. Күн сайын 50-60 теңге қоса ма, түсінбедім. Астықтың отаны саналатын солтүстік өңірлердің өзінде бірінші сұрыпты ұнның келісі - 144, жоғарғы сұрыпты 180 теңгеге қымбаттапты. Баға көтерілгелі көкшетаулық кәсіпкер Бибігүл Нұрышеваның кірісінен шығысы көбейген. Ол өнімдерін тек ұннан жасайды. Самса, бәліш пісіріп, нәпақа табатын келіншек астықты өңірде ұнның шарықтауы ақылға қонымсыз деп күрсінеді.
Бибігүл Нұрышева, кәсіпкер:
– Ұн қатты қымбаттап кетті. Май да қымбаттады. Біз істейтін тағамның бәрі майға қуырылады, ұннан жасалады. Чебурек 150 теңге болған, қазір 220 теңге. Бұл сұмдық қой! Өз бидайымыз бар, өзіміздің май шығаратын зауытымыз бар. Жыл басынан бері Қазақстанда 1,1 млн. тонна ұн өндірілген. Отандық ұн өндірушілердің экспорт көлемі де бірден 20 пайызға азайыпты. Қазақстанда диірмендер саны да азайып жатыр. Бәсекелестікке төтеп бере алмай, шағын компаниялар ғана емес, ірі өндіріс ошақтары да жұмысын тоқтатуға мәжбүр. Сарапшылар бағаның өсуіне ұн өндірісінің төмендеуі себеп деп отыр. Алайда Ауыл шаруашылығы министрлігі былтыр жиналған астық ішкі сұранысты қамтуға жетеді деп сендірді. Қазақстан қамбаларында 18 млн. тоннадан астам астық қоры бар екенін ескерсек, бұл қымбатшылық қисынға келмейді.
