Жаңалықтар Әлеумет Қазақстан Басты жаңалықтар Нулы өлкеде су тапшы Нулы өлкеде су тапшы «Айқын» ақпарат 19/06/2021 04:30 265 оқылды КЕСТЕ НЕГЕ САҚТАЛМАЙДЫ? «Булаев су» ЖШС бас директоры Жәнібек Жанәділов түсіндіргендей, мұндай жағдайдың қалыптасқанына бау-бақша суару кезеңі кінәлі. «Міне, екі жыл болды, маусым-шілде айларында су қат. Өйткені осы кезде тұрғындар бау-бақша суару үшін суды шамадан тыс көп қолданады. Басқа айларда суды 24 сағат бойы үзбей берген күннің өзінде 450-500 текше метр ғана жұмсалса, маусым-шілдеде 1 200-1 900 текше метр су шығындаймыз. Оның үстіне, соңғы кезде күн ыстық. Ол-ол ма, жекеменшік жер үйлердің иелері заңсыз сорғылар орнатып алған. Соның кесірінен су магистралі зардап шегіп жатыр. Қысым жеткіліксіз, колонкаларға су жетпей қалады», – дейді директор. Кәсіпорынның 3 200 абоненті бар. Олар су беру кестесі сақталмайтынын айтып шағымданып отыр. Оған қатысты директордың өз жауабы бар екен. Кесте бойынша тіршілік нәрі таңғы 6-дан 10-ға дейін, одан соң 12.00-ден 15.00-ге дейін және 18.00-ден түнгі 1-ге дейін беріледі. Бірақ директорға сенсек, қысымның аздығынан су колонкаларға жеткенше 40 минуттай уақыт өтетін көрінеді. Әрі резервуарларға су толтырып алу үшін 2-3 сағаттық үзіліс міндетті түрде қажет. Ал қараңғы түскен кезде үлкен-үлкен бөшкелермен келіп су ұрлаушылардың кесірінен бұл компания түнде суды өшіріп тастауға мәжбүр. Жәнібек Кириллұлы су мәселесі биыл шешілетінін айтып сендірді. Ол үшін пайдаланудан қалған ескі су мұнаралары іске қосылмақ. Ал Есіл ауданындағы Явленка ауылындағы су тапшылығын жою үшін аудан тұрғындарын сумен қамтып отырған «Ақ бұлақ – 2020» ЖШС директоры Ермек Ташмақанов биыл тамыз айында дифференциалды тариф енгізу жобасын қорғамақшы. Себебі кейбіреулер беті-қолын жууға су таба алмай отырғанда, басқалары жеміс-жидегін суарады. Ал дифференциалды тариф бойынша 1 адамға 3 текше метр су 145 теңгеден сатылатын болады. Ал одан артық пайдаланғысы келсе, әрбір текше метрі, яғни мың литрі үшін 1 300 теңгеден төлеуі тиіс. «Сонда ғана адамдар ойланып, суды оңды-солды шаша бермейді. Бау-бақша суаруға, көлік жууға техникалық су сатып алсын. Біздікі – тұрмыстық мақсатта қолданылатын су. Жалпы, біздің тұтынушыларымыздың 20 пайызы ғана аздаған қиындықтарға тап болып отыр. Жаңа резервуар салу да жоспарымызда бар. Жаңа үйлер салынып жатқандықтан, қуаттылықты арттырған жөн. Жалпы, су тапшылығы мәселесі биыл шешімін табады», – деді Ермек Ташмақанов. Мұнда да жаз айларында су тұтыну көлемі екі есе артады екен: 540 текше метрден 900-ге дейін. БАУ-БАҚША МЕН МАЛДАН БАС ТАРТЫП ОТЫР Су тапшылығы салдарынан кейбір тұрғындар бау-бақша баптап, мал бағудан бас тартуға мәжбүр. Облыс орталығының іргесінде тұрған 2 мыңдай тұрғыны бар Якорь ауылында апталап су болмай қалады. Соның салдарынан Наталья Божко жуырда сауып отырған жалғыз сиыры мен 30 қойын сатып жіберіпті. «Басқа амал болмаған соң, осындай қадамға бардық. Мал сусыз тіршілік ете алмайды. Мен ғана емес, ауылдастарымның барлығы дерлік малдарын өткізіп жатыр», – дейді Якорь ауылының тұрғыны Наталья Божко. Бұл ауылдағы су тапшылығына жерасты су желісінің жаңартылмағаны себеп. Қысым көбейсе, құбырлар шыдас бермейді. «Елу жылда ел жаңа» дегенмен, якорьлықтарға 50 жыл бойы қызмет көрсетіп келе жатқан желі жаңартылмағалы қай заман?! Якорь ауылдық округінің әкімі Валерий Тихийдің айтуынша, биыл құбырларды ауыстыруға 475 миллион теңге бөлініпті. Жобалық-сметалық құжаттары сараптамаға тапсырылған. Сараптамадан соң байқау жарияланбақ. Бірақ жұмыстар нақты қашан басталып, қашан аяқталары белгісіз. Әлеуметтік желіде пайда болған Якорьдағы су мәселесі туралы шуды облыстық Энергетика және тұрғын үй-коммуналдық шаруашылық басқармасының басшысы Әділбек Әубәкіров хайп деп бағалады. «Су мәселесі бойынша жұмыстар үнемі жүргізіледі. Бірақ осындай теріс әрекеттер барлық жұмысымызды жоққа шығарады», – дейді ол. Дегенмен осы жарияланымның арқасында Тайынша, Шағалалы, Қиялы, Чапаево, Виноградовка, Глубокое, Антоновка, Соколовка, Жаңажол, Мамлютка, Пеньково ауылдарында да су тапшылығы бар екені белгілі болды. Ал облыстық Энергетика және тұрғын үй-коммуналдық шаруашылық басқармасы биыл Солтүстік Қазақстан облысындағы ауылдардың 80 пайыздан астамын таза ауызсумен қамту жоспарлаған. Осы жұмыстарға 11 миллиард теңгеден астам қаржы бөлінбекші. Осы ақша құмға сіңген судай жоқ болмай, халықтың қажеттілігіне жұмсалса игі. Құбырлардың тозығы жетіп, қаусап тұрған 70 пайызы жөнделсе, тіршілік нәріне қатысты мәселенің шешімі де табылар ма еді, қайтер еді? Роза ШӘКЕНОВА
