Режиссер-дебютант Райымбек Әлжановтың «Мерген» атты қысқаметражды фильмі жанрлық киноларға арналған халықаралық Fantasia кинофестиваліне қатысады. Бұл туралы Ш.Айманов атындағы «Қазақфильм» хабарлады.
Фильмнің оқиғасы XVII ғасырдағы Ұлы даладағы соғыс кезінде өрбиді. Аталған фильмде жас та болса қолына қару алып, отбасын қорғауға бел буған Мерген есімді баланың өмірі баяндалады. Фильмдегі басты рөлді Әлихан Әби сомдайды. Сондай-ақ бұл картинаға Райхан Айтқожанова және Дулыға Ақмолда секілді танымал актерлер түскен. Фильмнің түсіру жұмыстары Алматы облысындағы Түрген шатқалында және «Қазақфильмнің» павильондарында жүргізілді. – «Мерген» фильмінің алғашқы көрсетілімі Fantasia кинофестивалінде өтетініне қуаныштымыз. Монтаждау жұмыстары аяқтала салысымен фильмді осы байқауға жібердік. Осы орайда маған қолдау білдіріп, фильмнің шығуына атсалысқан барлық түсіру тобына ерекше алғысымды білдіремін, – деді режиссер Райымбек Әлжанов. Fantasia халықаралық кинофестивалі биыл 25-рет өткізіледі. Бұған дейін онда Квентин Тарантино түсірген «Беславные ублюдки», Тимур Бекмамбетовтің «Ночной дозор», сондай-ақ «Пункт назначения» франшизасының бір бөлімінің тұсауы кесілген болатын. Айта кетсек, фестивальдің Radical spirit атты қысқаметражды фильмдерге арналған байқауына қазақстандық кинотуындымен бірге Ұлыбритания, Мексика, Аустралия, АҚШ, Қытай және Оңтүстік Кореяның туындылары қатысады. Байқау 5-25 тамызда Канадада өтеді. Кинотуындыны Мәдениет және спорт министрлігі тапсырысы бойынша «Ұлттық киноны қолдау орталығы» КЕАҚ қолдауымен Ш.Айманов атындағы «Қазақфильм» түсірген.Мейірім ҚАЙРАТҚЫЗЫ