Шымкентте жол құрылысы жұмыстары қарқынды жүріп жатыр. Бұл – жақсы жаңалық. Дегенмен осы жол құрылысы бірқатар кәсіпкердің кәсібіне кедергі болыпты. Жуырда қаладағы бірқатар кәсіп иесі жол жөндеу кезінде оқшауланып, шетте қалып қойған бизнес нысандары жайында шағым айтып «Атамекен» кәсіпкерлік палатасына барды.
Кәсіпкерлер, әсіресе Алматы–Ташкент айналма жолының учаскесінде, сонымен бірге Ақназархан көшесінің екі жағында орналасқан нысандар көлік байланыстарынан толығымен оқшауланып қалғанын айтады. Мұнда тауар жеткізу немесе сатып алынған затты арту үшін көлікті кіргізу мүмкін емес. Құрылысшылармен келісімге келе алмаған кәсіп иелері қайда барып мұңын шағарын білмеген. Осылайша, бар үмітті кәсіпкерлер палатасына артып келіп отыр.– Бір жарым жылдан бері бизнес нысаным жұмыс істемей тұр. Себебі оған жақындау мүмкін емес. Көліктердің қозғалысы тоқтатылды, барлық жалға алушылар кетіп қалды. Біз құрылысшылардың алаңды аяқтайтынын шыдамсыздықпен күттік. Енді, міне жұмысымызды жалғастыра алмай отырмыз. «Бізге жол ашып беріңіз» десем, «Өз қаражатыңызға істеңіз» деп кетті. 500 мың теңге шығын болатын жұмысты істеуге де дайын едім, алайда олар кейін бас тартты, – дейді бизнесі жабылып қалудың сәл алдында тұрған кәсіпкер Қанат Сарбасов.Кәсіпкер құрылысшылардың тауарлары бар қойма қақпасының дәл алдына жаяу жүргіншілер өткелін қойғанына наразы. «Мұны неге дұрыс ойластырмаған? Егер ондай өткелді қояр болса, ыңғайлы жер де бар еді ғой, – дейді кәсіпкер. Ол тротуарға көлік қойған жағдайда айыппұлдың да қомақты екенін, бұл жағдайларға ешкімнің жауап бермейтінін айтып күйінді.
«Қосанов» жеке кәсіпкерлігінің де жағдайы мәз емес. Жанармай құю бекетінің жұмыс істемей қалғанын айтып, шағымданды. Бұл ретте тапсырыс беруші мердігерге жолды жобалау кезінде автомобиль жолынан кіру қажет болатын бизнес нысанын сызбаларда көрсетпегенін атап өтті. Кәсіпкер мердігердің кінәсі жоғын, мұның жауабын тапсырыс беруші – Шымкент қаласының Жолаушылар көлігі және автомобиль жолдары басқармасынан сұрау қажет екенін айтады. «15 жылдан бері талапқа сай жұмыс істеп жатқан жанармай құю бекетінің осында орналасқаны жол салу кезіндегі жобалық-сметалық құжаттаманы әзірлеу кезінде назардан тыс қалған. Сөйтіп, кәсіпкердің мүддесі ескерілмеген» деп санайды «Қосанов» жеке кәсіпкерлігінің басшысы.Алайда жиынға қатысқан Шымкент қаласының жолаушылар көлігі және автомобиль жолдары бөлімінің бастығы Ержан Жолдасов мұндағы көтерілген барлық мәселені жоққа шығарды. Басқарма басшысының айтуынша, жанармай бекетінің мұнда орналасуы төтенше жағдайлар тудыруы мүмкін. Алайда «Атамекен» кәсіпкерлер палатасы жанындағы Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес мүшелері шенеуніктің бұл жауабына қанағаттанған жоқ. Қадағалау органы бұл мәселені зерттеп, қалалық прокуратураға хат жолдау туралы шешім қабылдады.
«Жағдайды зерделеу барысында жол жұмыстарын жобалау және жүзеге асыру кезінде тапсырыс беруші мен мердігерлер жол бойында орналасқан кәсіпкерлік нысандарына кіру-шығу нүктелері мен тұрақ орындарын ескермеген. Осылайша, кәсіпкерлердің жұмысын жандандыруына кедергі келтірген», – деді «Атамекен» кәсіпкерлер палатасы жанындағы Кәсіпкерлер құқығын қорғау кеңесінің хатшысы Сабира Адамбекова.Ал билік өкілінен тұшымды жауап ести алмаған кәсіпкерлер ендігі үмітті прокуратурадан күтпек.
Назгүл НАЗАРБЕК, Шымкент қаласы