«Nur Otan» партиясының сайлауалды жоспарын іске асыру аясында Қызылорда облысында бірінші жартыжылдықта Жосалы мен Жалағаш ауданының орталықтары табиғи газбен толықтай қамтылды. Қазір партияның «Өзгерістер жолы: әр азаматқа лайықты өмір!» өңірлік сайлауалды бағдарламасы 16 пайызға орындалып үлгерген.
Жалпы, алдағы 5 жылда 19 елді мекенді газбен қамту жоспарланған. Жыл соңына дейін Жол картасы аясында Қазалы қаласы Шиелі ауданының Бекежанов және Қодаманов ауылдары табиғи газға толық қосылады. Осылай тұрғындардың газ тұтыну үлесі 67,4 пайызға жетеді деп жоспарланған. Сонымен қатар Қармақшы ауданындағы Төретам және Ақай ауылдарының электр желілерін кеңейту және жаңғырту жұмыстары жүргізілді. Ал бұқаралық спортты дамыту аясында жақында Жалағаш ауданында жабық жүзу бассейні пайдалануға берілді. Кешен бір уақытта 20 адамға дейін қабылдай алады. Алдағы уақытта оқушыларға арналған тегін жүзу үйірмесі ашылмақ. Оған 20-ға жуық оқушы қабылданып, көпбалалы отбасылардан шыққан және ата-анасының қамқорлығынсыз қалған балаларға жеңілдіктер қарастырылмақ. Сондай-ақ мүмкіндігі шектеулі азаматтар мен қарттарға бассейнге күніне 1 сағат тегін кіру мүмкіндігі берілмек. 2025 жылдың соңына дейін өңірде тағы 19 жаңа спорт нысанын салу жоспарланған. Оның ішінде 5 спорттық-сауықтыру кешені, 12 стритбол алаңы және 2 жүзу бассейнін салу көзделіп отыр. Биыл Қызылорда қаласы бойынша «Бастау – бизнес» жобасы арқылы кәсіпкерлік негіздерін оқуға 535 адам қатыспақ. Сәуір айынан бастап 641 азаматтың кәсіптік жобасы «Атамекен» ұлттық кәсіпкерлік палатасына жолданған. 528 азамат оқу курстарын аяқтап үлгерген. Оның ішінде 102 азамат мемлекеттік грант алды. Жалпы, грант 660 азаматқа жоспарланған. Қазір 482 азамат мемлекеттік грант алып, шағын кәсібін ашқан. Мал шаруашылығымен 122 адам, құс шаруашылығымен 30 адам, көлік жөндеу орындарын ашқан 54 адам, тігін шеберханасын ашқан 156 адам, кондитерлік цех ашқан 120 адам тіркелген. Партия тарапынан бұл игі істер одан әрі жалғасын таппақ.М.ХАҚНАЗАР