Елімізде жыл сайын «Мектепке жол» акциясы аясында аз қамтылған және көпбалалы отбасылардағы мектепке баратын оқушыларға көмек көрсетіледі. Қайырымдылық шарасының шеңбері де жылдан-жылға артып, қарастырылатын қаражат көлемі де көбейіп келеді. Жоғарының жомарттығын жергілікті билік қаншалықты орындап жүр? Оқушыларға бергендері құдалықтарда қолдан-қолға өтетін костюм, ал аяқкиімі екі есе үлкен. Қағаз-қаламдарының да құны төмен. Карантин кезінде де қыруар қаражатқа концерт ұйымдастырып, есебін бере алмайтындар қайырымдылыққа келгенде қаржы «үнемдеуге» көшкен бе? Ал кейбір облыстардағы көпбалалы отбасылар бұл акцияның барын да бірінші рет естіген. Оларға деп бөлінген қажетті көмек кімдерге кетті?
«Айдағаным бес ешкі, ысқырығым жер жарар» демекші, аймақтағы атқамінерлер қайырымдылықты жарнама жасауға ұластырып жібергенін көріп жүрміз. Әсіресе, Құрбан айт, Жеңіс күні мен 1 қыркүйек – білім күні жақындағанда әлеуметтік желі бетінде шенеуніктер қайырымдылық әсер қалдырады. Жарнамасына қарап жасаған жақсылықтарына іштей жүрегің жылып қалғанымен, артынша көңіліміз су сепкендей басылатыны да жасырын емес. Осыдан біраз жыл бұрын бір облыста толарсақтан саз кеше жүріп, жеңіс туын желбіретуге зор еңбек еткен соғыс ардагеріне жергілікті жердің басшылары қолсағат сыйға тартып кетеді. Еңбегін ескерусіз қалдырмаған жауаптыларға ақ батасын жаудырған ақсақалдың немерелері артынша істен шыққан сағатты әкімдікке қайтарып беріпті. Былтыр 9 мамыр Жеңіс күні қарсаңында Жамбыл облысының жауапты қызметкерлерінің әрекеті де біраз сынға қалды. Сол кезде де облыстағы атқарушы органның қызметкерлері өзі әрең отырған қартты ортаға алып, апарған затын жарнамалау үшін фотоға түскен. Көпбалалы, аз қамтылған отбасылардағы балаларға көмектесуді мақсат еткен акцияның аясында көмек алған Аяулым: «Былтыр мектепте оқитын екі балама кеңсе тауарлары мен мектеп сөмкесін алдым. Сөмкесі қатты керемет деп айта алмаймын, бірақ ұстауға болады. Ал қалам-қарындаштарын пайдаланған жоқпыз. Себебі дұрыс жазбайды. Қаламның сапасы мүлдем нашар болып шықты», – дейді. Аяулымның айтқан сөзінің жаны бар секілді. Өйткені өз таныстарымның арасында да қайырымдылық акциясы аясында үлестірілген кеңсе тауарлары жарамсыз болып, артынша өз қаражаттарына қайта қалам алғандар бар.«Мектепке жол» акциясы
Күні кеше Түркістан облысы жауаптыларының жасаған «жақсылығы» жұрттың ашуын келтірді. «Мектепке жол» акциясы аясында әкелген киімдер оқушылардың өзіне емес, әкелеріне шақ болып шыққан. Көпбалалы ана ұлдарына берілген мектеп формасының өлшемі бір емес, бірнеше есеге үлкен болып шыққанын айтады. Ал қыздарына деп берілген киім-кешек кешігіп келген. «Нарықтағы киімдердің өлшемі әртүрлі. Біз бір жарым жыл бойы онлайн оқығандықтан, былтыр киім алған жоқпыз. Сондықтан екі жыл бұрын алған формадан бір-екі өлшем үлкеніне тапсырыс бердім. Балалардың киімі мен көрсеткен өлшемдермен келді. Бірақ әкелген киімдері балаларға емес, ересектерге арналған киімдер екен. Аяқкиімдері де үлкендерге арналған», – дейді Қақпақ аулының тұрғыны Гүлшат Вафаева. Оның айтуынша, 3 тамыз күні оған балаларының оқуға дайындығына бір реттік АӘК ретінде 250 мың теңге тағайындалған. Аудандық білім бөлімінің мамандары көпбалалы анаға атаулы көмектің орнына 1 қыркүйекке дейін балаларына жаңа мектеп формасы және оқуға қажетті құрал-жабдықтар берілетінін айтыпты. Қуанышы қойнына сыймаған ана мектеп формасын 31 тамыз күні түнгі сағат 1-де бір-ақ алыпты. Алайда ұзақ күттірген киімдерінің өлшемі ересек адамдарға арналған екен. Ал қыздарының мектеп формасын одан да кешіктіріп берген.Сапасына сын таға алмаймыз
Елордада биыл жаңа оқу жылына дайындық кезеңінде 15 мыңға жуық балаға атаулы әлеуметтік көмек берілген. Тамыздың 11-нен басталған жыл сайынғы жалпыға бірдей міндетті орта білім беру бағдарламасы аясында белгілі бір санаттағы оқушыларға мектеп киімі, аяқкиім және жазу керек-жарақтарын сатып алуға материалдық көмек көрсетіледі. Өткен жылы оны 13 245 оқушы алса, биыл 15 мыңға жуық оқушы осындай көмекпен қамтамасыз етіліпті. Сонымен қатар елорда оқушыларына «Мектепке жол» дәстүрлі акциясы аясында да көмек көрсетіледі. Жыл басынан бері 7 мыңға жуық бала мектепке қажетті кеңсе тауарларымен қамтылған. Бұдан бөлек, аудандық әкімдіктер 2 100 балаға керек-жарақтары бар мектеп рюкзактарын табыс етіпті. Әкімдіктің осындай көмегін алған Рызхан апа астаналық атқамінерлерге дән риза екенін жеткізді. «Ортаншы баламның бес баласы бар. Оның екеуі мектепте оқиды. Немерелерімнің мектептегі мұғалімдері әкімдікке аты-жөндерін ұсынып қойыпты. Сабақ басталардың алдында әкімдіктен хабарласып, мектепке қажетті заттар берілетінін айтты. Былтыр да, биыл да мектеп сөмкесімен бірге қажетті кеңсе тауарларын алдық. Сапасына сын таға алмаймыз. Сөмкесі де, қалам-қарындаштарын да «Абди» дүкендер желісінен алыпты. Бұл да болса көмек», – дейді ағынан жарылған Рызхан апа.Ешкімнен ештеңені жасыра алмайсың
Алматы облыстық Jetisu Media мемлекеттік мекемесінің маманы Анар Сабырқызы аймақта қолға алынып жүрген қайырымдылық акциялары туралы теріс пікір болмағанын алға тартты. «Егер сапасыз дүние үлестірілетін болса, ондай жағдайды жасыру мүмкін емес. Қазір барлығының қолында смартфоны бар. Кез келген желіге салса болды, бүкіл республика біледі. Сондықтан ешкімнен ештеңені жасыра алмайсың. Менің білуімше, биыл облыста 75 мыңға жуық бала «Мектепке жол» акциясы аясында көмек алған. Жағдайы жоқ отбасыларға бұл үлкен көмек. Өйткені бір үйде бірнеше оқушысы бар отбасыларда бір балаға керек-жарақ алуға біраз қаржы керек. Оның үстіне пандемия кезінде табысы төмендеген отбасылар бар. Сондықтан барлығы әділ болса игі», – дейді ол. Оның айтуынша, қайырымдылықты жарнамалауда тұрған ештеңе жоқ. Осылай деп санайтын Анар Сабырқызы мемлекеттік бағдарламаны жарнамалай отырып, қалталы адамдардың санасына сілкініс жасауға болады екен. «Жарнамалау арқылы азаматтарға ой сала аламыз. Өйткені біздің қоғамда бір-бірінен асып түскісі келіп тұратын адамдар көп. Бір кісі қайырымдылық қылса, екінші қалталы адам одан да асып түскісі келіп, жомарттық жасауы мүмкін. Бір жағынан мемлекеттік бағдарламаның аясында жасалып жатқан дүниені көрсеткен дұрыс. Оның да өз есебі бар», – дейді Анар Сабырқызы. Ата-жөнін атамауымызды өтінген Алматы облысының тұрғыны, алты баланың анасы: «Зейнеткерлерге бір келі күріш, бір келі қант, бір келі кеспе әкеледі. «Мектепке жол» акциясы деп керек-жарақтар үлестіреді. Әлеуметтік желіге қарасаң, біздегі қарттар мен оқушыларға барлық жағдай жасалып жүрген секілді. Бірақ беріп жатқан дүниелері сапасыз. Әкелген кәмпиттері қатып қалған, шайларының түсі не дәмі жоқ. Бір келі кеспе алып бергенше, бір келі ет алып берсе ғой. Болмаса, қажетті дәрі-дәрмегін әкелсе, дұрыс болар еді. Оқушыларға да арзан дүниені құшақтап келіп, керемет қылып көрсетіп жатады. Оның орнына әркімнің карточкасына ақшалай бере салса болады емес пе? Бізде міндетті түрде жарнамалап «беріп жатырмыз» деп ауыз толтырып айтады. Берген сөмкелері бір жылға әрең шыдайды», – дейді. Бір адамның шынайы ризашылығына бөленіп, қайырымдылық жасау үшін жүректегі мейірім мен ниеттің адалдығы болса жеткілікті. Өкінішке қарай, қазіргі қайырымдылықты берекенің кілті деп емес, жарнама жасауға таптырмас мүмкіндік деп түсінетіндер көп. Асыл дінімізде де «Әрі жақсылықты көп болып қайтуы үшін жасама» деп бұйырады. Ендеше мемлекет тарапынан жасалатын жақсылықты адал жолмен әрі қайтарымын күтпей қайырымдылық қылсақ, қанеки?!Жадыра МҮСІЛІМ