«Nur Otan» партиясы Батыс Қазақстан облыстық филиалының төрағасы, облыс әкімі Ғали Есқалиевтің төрағалығымен саяси кеңес бюросының отырысы өтті. Онда «Nur Otan» партиясы Батыс Қазақстан облыстық филиалының 2025 жылға дейінгі «Өзгерістер жолы: әр азаматқа лайықты өмір!» сайлауалды бағдарламасын жүзеге асыру үшін бекітілген Жол картасының орындалуы талқыланды.
Жиында Жол картасын жүзеге асыруда орындалмау қаупі бар тармақтар қаралып, ол бойынша жауапты басқарма басшыларының баяндамалары тыңдалды. Ең алдымен, сөз кезегі облыстық Құрылыс басқармасының басшысы Әлібек Антазиевке берілді. Өз кезегінде Әлібек Сайынұлы құрылыс саласы бойынша жүзеге асырылған іс-шаралар мен орындалмау қаупі бар жұмыстар жөнінде баяндады. Басқарма басшысының айтуынша, Жол картасында белгіленген шаралардың орындалмау факторларына Жобалық-сметалық құжаттардың дұрыс дайындалмауынан уақытының асып кетуінен немесе мердігерді анықтау үшін тендердің кеш өткізілуі және т.с.с мәселелерін жатқызды. Сондай-ақ облыстық Жолаушылар көлігі және автомобиль жолдары басқармасының басшысы Бауыржан Айтмағамбетов жол құрылысы бойынша орындалмау қаупі бар көрсеткіштер бойынша баяндама жасап, бағдарламада белгіленген шараларға мемлекет тарапынан қолдау көрсетілмесе, іске асырылмай қалу қаупі басым екенін жеткізді. Атқарушы органдардың есебін қорытындылай келе, өңірдің денсаулық сақтау саласы бойынша орындалмау қаупі бар пункттер жөнінде жауапты басқарма басшысының міндетін атқарушы Арман Қалыбековке баяндама жасап, бүгінгі күні қаланың эпидемиологиялық ахуал бойынша деректерді тілге тиек етіп, тұрғындардың денсаулығын жақсартуға бағытталған тармақтардың жүзеге асырылу барысын айтты. Басқармалардан бөлек, Жол картасының орындалу барысы жөнінде бірқатар аудандардың (Ақжайық, Қазталов, Теректі аудандарының әкімдері мен Тасқала ауданы әкімінің міндетін атқарушы) басшылары да қысқаша баяндама жасады. Атап айтқанда, облыс бойынша орындалған ауқымды іс-шаралардың шеңберінде облыс орталығында Орал трансформатор зауытында «панельді радиаторларды дайындау» жобасы іске қосылды, сондай-ақ көлемі 5 га жылыжай кешені және жергілікті «Квант ЖШС» жиһаз фабрикасында қуаттылығы жылына 22 мың бірлік цех ашылды. Теректі ауданында 1 мың ірі қара мал басы арналған бордақылау алаңы салынды. Бөрлі ауданында 600 басқа арналған сүт фермасының құрылысы аяқталды. Сонымен қатар Бөкей ордасы, Теректі және Казталов аудандарында 160 орындық денешынықтыру-сауықтыру кешені ашылып, облыс бойынша 16 спорттық ойын алаңдары пайдалануға берілді. Сырым ауданының Қосарал, Жетікөл, Тоғанас, Құспанкөл және Аңқаты, Тасқұдық ауылдары, Бәйтерек ауданының Асан, Октябрь ауылдары ауызсумен толығымен қамтылды. 2021 жылы «Нұрлы жер» бағдарламасы аясында 2 500-дей пәтер салу көзделген. Осы жылдың соңына дейін 1 439 пәтерді пайдалануға беру жоспарлануда, қазірдің өзінде 302,035 мың шаршы метр тұрғын үй пайдалануға берілді. Бүгінде 232 ауылдық елді мекен орталықтандырылған сумен жабдықталған. 26 мыңнан астам тұрғыны бар 21 ауылдық елді мекенде күрделі жөндеу және реконструкциялау жұмыстары жүргізіліп жатыр. Қазір облыс бойынша 10 білім беру нысанының, 2 денсаулық сақтау нысанының, 2 мәдениет үйінің, 5 денешынықтыру-сауықтыру кешенінің, Зашаған кентінде балалар мен жасөспірімдер спорт мектебінің құрылысы жүргізіліп жатыр. Сондай-ақ жыл соңына дейін 786 оқушыны қамтитын 4 мектептің құрылысын аяқтау жоспарға енгізілді. Қазір облыс бойынша 345 мектепте балаларды инклюзивті біліммен қамтуды ұлғайту мақсатында мамандандырылған кабинеттер ашылды. Атап айтсақ, 4 мыңнан астам балаларға оқу үшін қажетті барлық жағдай жасалған. Студенттердің оқуы мен тұруы үшін қолайлы жағдай жасау мақсатында Батыс Қазақстан жоғары медициналық колледжінің студенттеріне арналған 144 орындық жатақхана пайдалануға берілді. Жақын арада Батыс Қазақстан университетінің студенттері үшін 500 орындық жатақхана ғимараты пайдалануға берілмек. 5 жыл ішінде 1 200 жасты жатақханамен қамту үшін: «Орал трансформатор зауыты» АҚ қолдауымен Батыс Қазақстан индустриялық колледжінің студенттері үшін 150 орындық жатақхана ғимаратын қайта жаңарту, Орал политехникалық колледжінің студенттері үшін 150 орындық жатақхана құрылысын күрделі жөндеуден өткізіп (2 қабаттың қабырғасын көтеру), қайта жаңарту жұмыстары жүргізіледі. Өңірдегі еріктілер қозғалысын дамыту мақсатында жыл басынан бері облыс бойынша Орал қаласы мен Бәйтерек, Ақжайық, Сырым, Теректі, Тасқала, Бөрлі аудандарында 7 волонтерлік клубтар құрылды. 2021 жылдың соңына дейін Жаңақала, Шыңғырлау, Бөкей ордасы, Қаратөбе, Жәнібек, Казталов аудандарында тағы 6 еріктілер клубын ашу жоспарланып отыр. Бюро отырысында баяндалған тармақтардың орындалуы бойынша ұсыныс-пікірлер білдіріліп, сапалы іске асырылуы талқыланды. «Nur Otan» партиясы Батыс Қазақстан облыстық филиалының төрағасы Ғали Есқалиев отырыс соңында облыстық және аудандық партия филиалдары мен жауапты басқарма басшыларына Жол картасында көрсетілген индикаторлардың мерзімінде және сапалы орындауды ұйымдастыруды тапсырды. Ол сондай-ақ орындалмай қалу қаупі бар 21 іс-шараның жұмысын және нысандарға бөлінген қаражаттың мақсатты жұмсалуын қатаң бақылауға алуды жүктеді. Күн тәртібінде қаралған мәселелер бойынша қаулы қабылданды.Әбілмансұр ЖАСАН