Жақында жергілікті әлеуметтік желілерде Өскемен қаласындағы Титан магний комбинатында екі жұмысшының опат болғаны туралы ақпарат тараған болатын. Осы жағдайға байланысты түсініктеме берген Шығыс Қазақстан облыстық Полиция департаменті қайғылы жағдайдың нақты қандай кәсіпорында болғанын ашып айтпаған еді.
«Осы жылдың 5 қарашасында Өскемен қаласының Ертіс полиция бөлімі абайсызда екі адамның өліміне әкеп соққан еңбекті қорғау ережелерін бұзу фактісі бойынша сотқа дейінгі тергеп-тексеруді бастағанын хабарлайды. Қазір қылмыстық іс бойынша тиісті сот сараптамалары тағайындалды, істің мән-жайларын зерттеудің жан-жақтылығын, толықтығын және объективтілігін қамтамасыз етуге бағытталған қажетті тергеу әрекеттері жүргізілуде. Қылмыстық іс жүргізу кодексінің 201-бабы 1-бөлігіне сәйкес, сотқа дейінгі тергеп-тексеру деректері жария етуге жатпайды» деген еді департаменттің баспасөз қызметі. Адам өлімімен аяқталған оқыс оқиғаның Титан магний комбинатының өзінде емес, кәсіпорынмен еншілес POSUK Titanium ЖШС-да 5 қараша күні сағат 17.20 шамасында болғанын Шығыс Қазақстан облыстық мемлекеттік еңбек инспекциясы басқармасының басшысы Бақытбек Қизатов мәлімдеді. «Белгілі болғандай, олар электронды-сәулелік пеште профилактикалық жөндеу жұмыстарын жүргізіп жатқан. Сол жерге басқарма мамандары мен прокуратура қызметкерлері шұғыл келіп жетті. Қазір оқиғаның себебі мен мән-жайын анықтайтын арнайы комиссия құрылып жатыр» деген еді басқарма басшысы. Б.Қизатовтың сөзіне сенсек, арнайы құрылған комиссияның құрамына Еңбек инспекциясы, Өндірістік қауіпсіздік, Санитариялық-эпидемиологиялық бақылау департаменттері, жұмыс беруші (POSUK Titanium ЖШС) мен кәсіподақ өкілдері енген. Ал кәсіпорында 1994 жылы дүниеге келген екі жігіт көз жұмған. Біреуінің отбасы бар. Бір деректерде отбасылы жігіттің соңында бір баласы мен аяғы ауыр келіншегі қалғаны айтылады. 8 қарашада жергілікті сайттардың бірі кәсіпорында мерт болған жұмысшының ағасы: «Міне, екі күн өтті. Бүгін бауырымызды жерледік. Бізбен ешкім байланысқа шыққан жоқ. Жағдайды түсіндірген жоқ. Не болғанын ұқпай отырмыз» деген сөзін жариялаған болатын. Мәселенің мән-жайын білейік деп туыстарына хабарласқанымызда сұхбат беруден бас тартты. Қапияда ажал құшқан екі жұмысшы еңбек еткен POSUK Titanium ЖШС бас директоры Станислав Барановичке телефон соқтық. Әуелі «Телефон арқылы жауап бермеймін», – деді. «Онда жұмысыңызға барайық» деп едік, «мұнда кіруге рұқсат жоқ», – деді. Енді не болмақ? Кәсіпорынға шара қолдана ма? Шығыс Қазақстан облыстық Мемлекеттік еңбек инспекциясы басқармасының басшысы Бақытбек Қизатовтың айтуынша, арнайы құрылған комиссия 10 жұмыс күні ішінде тиісті қорытынды шығарады. Егер комиссия «екі жұмысшы жұмыс барысында опат болған» деген қорытынды шығарса, жұмыс беруші тарапынан зардап шеккендерге көмек көрсетіледі. «Біріншіден, жұмыс орнын сақтандырған сақтандыру компаниясы тарапынан зардап шеккен жандардың асырауындағы адамдарға тиісті төлемдер төленеді. Бұдан тыс кәсіпорын өз тарапынан материалдық тұрғыдан көмек көрсете алады. Екіншіден, кәсіпорында олқылыққа жол берген адамдар әкімшілік жауапкершілікке тартылады. Полиция органдары қылмыстық жауапкершілікке тартуы да мүмкін. Біздің қазіргі жұмысымыз – оқыс оқиғаның себеп-салдарын анықтау, осындай жағдайдың тағы да қайталануына жол бермеу» деген басқарма басшысы жыл басынан бері өңір кәсіпорында 153 жазатайым оқиға тіркеліп, 16 адам көз жұмғанын жеткізді. Былтыр осы уақытта аймақтағы өндіріс орнында 164 адам әртүрлі деңгейде жарақат алып, оның ішінде 21 адам қайтыс болған. Ал Титан магний комбинатында мұндай қайғылы жағдай көптен бері тіркелмеген екен. Орайы келгенде айта кетейік, жылына 6 мың тоннадан астам титан құймалары мен балқымаларын шығаруға қуатты POSUK Titanium зауыты 2014 жылы Елбасы Нұрсұлтан Назарбаевтың қатысуымен Индустрияландыру күніне орай өткен жалпыұлттық телекөпір барысында пайдалануға берілген болатын. Бұл – Оңтүстік Кореяның POSCO компаниясы мен Өске¬мен титан-магний комбинатының (ӨТМК) бірлескен жобасы. Осы жобаны жүзеге асырғаны үшін «ӨТМК» АҚ президенті Әсем Мамытова «2014 жылғы өндірістегі үздік инновация» аталымы бойынша «Алтын сапа» сыйлығын иеленген еді.Азамат ҚАСЫМ, Шығыс Қазақстан облысы