1991 жылмен салыстырғанда кәсіптік және техникалық білім беру жүйесінде де оң өзгерістер бар. 1991 жылы облыста 10 колледж болса, тәуелсіздік жылдары оның саны үш есе артып, бүгінде 27-ге жетті. Мемлекеттік тапсырыс бойынша білім алатын студенттер саны да үш есе көбейген. Өңірдің даму қажеттілігіне орай туризм, ақпараттық технологиялар, халыққа қызмет көрсету салаларында еңбек ететін бірнеше жаңа мамандықтар ашылды. Бүгінде сол мамандықты игерген мамандар экономиканың түрлі саласында табысты еңбек етіп, елдің дамуына өз үлесін қосып жатыр. Білім беру нысандарының көбеюіне мемлекеттік-жекеменшіктік институттың дамуы мен бизнес сектор инвестициясының ықпалы зор.
– Тәуелсіздіктің алғашқы жылдарымен салыстырғанда өңірдегі мемлекеттік тілде оқытатын мектептер саны 3,5 есеге артты. Бүгінде барлық оқушының 77 пайызы мемлекеттік тілде білім алады. Сонымен қатар соңғы үш жылда «Алтын белгі» иегерлері 30 пайызға, үздік аттестат иегерлері 40 пайызға көбейді. Өңірге қажетті мамандар даярлау мақсатында 2018 жылдан бері 25 мамандық түрі бойынша 485 студентке, 40 магистрантқа облыс әкімінің оқу гранты берілді. Негізінен денсаулық сақтау, білім беру және ауыл шаруашылығы мамандықтарына басымдық беріліп отыр. Аталған оқу грантының саны жыл сайын артып келеді, – деді Маңғыстау облыстық Білім басқармасының басшысы Светлана Төлебаева.
Мәдина ЖӘЛЕЛҚЫЗЫ, Маңғыстау облысы