Қазақ тарих ғылымына орасан зор үлес қосқан, белгілі тарихшы, профессор, академик Талас Омарбеков дүниеден өтті. Тарихшылардың тірегі, ақтаңдақтарды зерттеген ірілердің бірі еді.
Ол 1948 жылы 29 мамырда Жамбыл облысының Байзақ ауданы Ақжар ауылында дүниеге келді. Ол орта мектептен соң сол кездегі Абай атындағы ҚазПИ-дің тарих факультетін бітіріп, 1971 жылы Жамбыл облысының Жуалы және Байзақ аудандарында тарих пәнінің оқытушысы, оқу ісінің меңгерушісі қызметтерін атқарды. 1972 жылы ол республикалық баспасөз беттерінде тарихты оқыту әдістемесіне арналған көлемді мақалаларын жариялай бастады. 1977 жылы өзі білім алған Абай атындағы ҚазПИ-дің аспирантурасына іштей оқу бөліміне түсіп, оны аяқтаған соң осында оқытушылыққа қалдырылды. Ал 1982 жылы ол кандидаттық диссертациясын қорғады. Кейін кандидаттығын, одан соң тарихшы Кеңес Нұрпейісовтың ғылыми кеңесшілігімен докторлығын қорғады.
Академик Т.Омарбековтің ғылыми еңбектері алыс және жақын шет елдерде өткен халықаралық конференцияларда баяндалып, беделді шетелдік басылымдарда жарияланған.
Қазақ тарихының ақтаңдақтарын зерттеп, тарих ғылымына айрықша үлес қосқан ғалымның қазасы қабырғамызды қайыстырып әкетті.
Ғалымның қазасына байланысты отбасына, туған-туыстарына қайғырып көңіл айтамыз.
Марқұмның жатқан жері жайлы, топырағы торқа болсын!
