Жамбыл облысында студентті белгісіз біреулер атып тастаған. Нұрсұлтан Қуатбаев cол күні нағашы әжесінің үйінен қайтып келе жатқан екен. Қара жамылған отбасы тұңғыштарын кімнің және қай жерде атқанын білмейді. Полиция тергеу құпиялылығына байланысты нақты ақпарат бермепті. Ал бозбаланың өмірі үшін күрескен дәрігерлер Нұрсұлтанның денесінен үш оқ алған. Марқұмның туыстары оқиғаның мән-жайы туралы сұхбат берген, – деп хабарлайды "Информбюро" жаңалықтар қызметі.
Нұрсұлтан Қуатбаев Алматыдағы Қазақ бас сәулет-құрылыс академиясының екінші курсында оқыған екен. Қысқы демалысты пайдаланып, Тараздағы ата-анасының қасында болуға келіпті. Әкесі Бақытжанның айтуынша, ол жаппай тәртіпсіздік кезінде үйінен мүлдем шықпаған. Тек 7 қаңтар күні нағашы әжесіне барған. Ал кешке коменданттық сағат уақытында өз үйіне қайтып келе жатып, оққа ұшыпты. Бірақ нақты қай жерде, қалай қайтыс болғаны туралы хабарсыз. Дәрігерлер марқұмның үш жеріне оқ тигенін айтқан.
“Жамбасына екі оқ тиген. Мына оң жақ, жүрек жағынан бір оқ тиген. Неге ол? Сол кезде артынан атқан, бала құлаған. Келіп добивать етіп, мына жақтан атып отыр ғой. Дұрыс емес қой ол”, – дейді марқұм Нұрсұлтан Қуатбаевтың әкесі Бақытжан Шыңғысбеков.
Нұрсұлтан отбасындағы бес баланың тұңғышы болған. Ол бала кезден ән айтуға құмартып, өмірін өнермен байланыстыруды армандапты.
“Өзім-ақ осылай-осылай көтерілемін. Ешкімнің демеуінсіз деп өзін-өзі көтеріп жүрген бала еді. Қияли. Өзінің арманына жете алмай қалды балам. Оның арманы көп еді”, – дейді Марқұм Нұрсұлтан Қуатбаевтың әжесі Кеңескүл Шыңғысбекова.
Ал облыстық полиция департаментінің өкілдері тергеу ісінің құпиялылығына байланысты деп, ешбір ақпарат бермеді. Бірақ Нұрсұлтанның кімнің қолынан қаза тапқаны анықталады деп отыр.
“Қазіргі таңда аталған дерек бойынша тергеу амалдары жүргізілуде. Тиісті сараптамалар тағайындалды. Қылмыстық істің мән-жайы тергеу мүддесіне байланысты ҚР ҚПК 201-бабына сәйкес жариялануға жатпайды”, – дейді Жамбыл облыстық Полиция департаментінің баспасөз хатшысы Гүлсара Мұхтарқұлова.
Қайғыдан қан жұтқан отбасы Нұрсұлтанның қандай жағдайда қаза тапқаны ашық айтылсын дейді. Әрі 18 жасқа жаңа толған жазықсыз жанға оқ атқан адамдар заң аясында тиісті жазасын алсын деп талап қойып отыр.
