Бүгін Премьер-министрдің орынбасары Ералы Тоғжанов қаңтар оқиғасы кезіндегі фактілерді тергеумен айналысатын «Аманат» тәуелсіз комиссиясының өкілдерімен кездесті, – деп жазады primeminister.kz.
Кездесу кезінде құқық қорғаушылар комиссия қызметінің бағыттары туралы әңгіме қозғады.
«Аманат» комиссиясының өкілдері қаңтарда болған оқиғаларды тергеудің объективтілігі мен ашықтығын қамтамасыз етудің маңыздылығын атап өтіп, мемлекеттік органдардың жұмысын ұйымдастыру бойынша бірқатар ұсыныс білдірді. Вице-премьер мемлекеттік органдарға қоғамдық комиссияның әрбір ұсынысын мұқият пысықтап, мәселелерді заңнамада белгіленген тәртіппен шешуді, сондай-ақ комиссия қызметіне қажетті көмекті көрсетуді тапсырды.
Айта кетейік, «Аманат» қоғамдық комиссиясы 2022 жылы қаңтарда болған оқиғаларға байланысты негізсіз қудаланған азаматтардың құқықтары мен бостандықтарын қорғау үшін құрылды.
Негізгі мақсаты – бейбіт наразылыққа қатысқаны үшін тергеуде болған, бірақ қылмыстық ниеті болмаған, сондай-ақ қылмыстарға қатысы жоқ адамдарды қылмыстық қудалаудан босату.
Комиссия құрамы сегіз адам бар. Оның ішінде төрт кәсіби заңгер, бір Мәжіліс депутаты, Ұлттық қоғамдық сенім кеңесінің бір мүшесі бар және Бас прокуратура мен Ішкі істер министрлігінен бір өкілден қосылды.
