Бұл – қазақтың тілегі!
Президент Қасым-Жомарт Тоқаевтың Qazaqstan телеарнасына Жайна Сламбекке берген сұхбатын мұқият тыңдадым. Көпшіліктің көкейіндегі, әлеуметтік желіде көтерілген сұрақтар қойылды. Басында бейбіт басталған шеруді қандықол қараниеттілердің пайдаланып, төңкеріс жасағысы келгенін айтып, бұл іске шатысы барларға қатысты тергеудің аса құпия жүріп жатқанына тоқталды. Оны түсінеміз. Тек сол тергеудің әділ де шынайы, түпкілікті де терең зерттеліп жүргенін, шындықтың жариялануын қалаймыз, халық соны күтеді. Президенттің өз сұхбатында атап өткені бар, атамай кеткені бар, ел саясатында жіберілген ең ірі идеологиялық қателердің кесірі орасан, оны бірден түзеу де оңай емес екенін білеміз. «Қасіретті қаңтар» ызғары әлі жанды қарып, жүректі сыздатып тұр. Оның үстіне, «ақпараттық соғыстағы жеңілістен», экономикадағы дағдарыстан, басқа да ауыр соққылардан есімізді жиып, ел іргесін нықтау, елдігімізді сақтау тек өзімізге байланысты. Қасым-Жомарт Кемелұлының қазақ тілі туралы айтқаны көңілге қонымды. Оның үстіне, Тоқаевтың қазақ журналистикасына жақсы баға бергеніне қарағанда алдағы уақытта Қазақ елінің президенті ретінде қандай деңгейдегі жиын болмасын, өзі бас болып тек мемлекеттік тілде сөйлеп, басқаларға үлгі болса деген тілек бар. Бұл – қазақтың тілегі!Бақытхан ЖАНШАЕВА, Ақтөбе облыстық мәслихатының депутаты
Мемлекеттік тіл – ұлттың болмысы
Мемлекеттік тілдің өзектілігін Президент Қасым-Жомарт Тоқаев Qazaqstan телеарнасына берген сұхбатында атап өткен болатын. Бұл ретте ел Президентінің «Біздің халқымыз талай «тар жол, тайғақ кешуді», қилы заманды басынан өткерген. Қиындықтың бәрін жеңген. Кешегі қасіретті оқиға кезінде халқымыз бірлігін көрсетті. Осы құндылықты келешек ұрпаққа аманат етуіміз керек. Қазақстанның болашағы жарқын болатыны сөзсіз. Мен бұған кәміл сенемін. Біздің бір ғана Отанымыз бар. Басқа Отанымыз жоқ. Болмайды да. Еліміздің Тәуелсіздігі бәрінен қымбат» деп ерекше тоқталды. Расында да, ендігі кезекте жаңа саяси-реформалардың, «әділетті қоғамның» жаршысы ретінде бір кісідей жұмылып, Президентімізге Қазақстанның жаңа даму кезеңін құруға әркім өз саласы бойынша үлес қосуымыз керек.Мейіржан ОТЫНШИЕВ, «Nur Otan» партиясы Алматы қалалық филиалы төрағасының бірінші орынбасары