Қазақстанның Украинадағы төтенше және өкілетті елшісі Дархан Қалетаев қазақстандықтарды эвакуациялау жолдары туралы айтты. Оның сөзіне қарағанда, Украинаның әуе кеңістігі жабық, сондықтан елшілік басқа жолды қарастырып жатыр, – деп жазады Азаттық радиосы.
- Әуежай іздеп жатырмыз. Қай жерге Air Astana-ның ұшағы қонатын мүмкіндік барын анықтау керек. Беларусьпен шекара жабық. Молдоваға автокөлік жолы Одесса арқылы баратындықтан қауіпті. Ол жерлерде соғыс болып жатыр. Ең қауіпсізі Львов қаласы, азаматтарға сол жаққа баруды ұсынып жатырмыз. Ары қарай Польша не Венгрияға шығаруға тырысамыз. Азаматтардың Еуропа елдеріне визасы жоқ, сондықтан қай мемлекет бізге жасыл коридор бере алатынына байланысты. Әзірге жоспар осындай, – деді елші.
Елшінің айтуынша, Киев көшелерінде кептеліс, тұрғындарда дүрлігу бар. Соған қарамастан елшілік жұмыс істеп тұр. Қазір елшілік ғимаратында Қазақстанның 30 шақты азаматы бар. Украинадағы Қазақстан елшілігінің мәліметінше, 2 мыңдай азамат консулдық тіркеуде тұр.
24 ақпанда таңертең Қазақстан сыртқы істер министрлігінің ресми өкілі Айбек Смадияров Украинадағы қазақстандықтарды эвакуациялау амалдарын қарастырып жатқанын хабарлаған.
