Түркістан облысында 3 айлық қызын өлтірген келіншек 15 жылға сотталды

Түркістан облысында 3 айлық қызын өлтірген келіншек 15 жылға сотталды 1
© atomiyme.com

Түркістан облысының Қылмыстық істер жөніндегі мамандандырылған ауданаралық сотында қайын енесімен болған жанжалдан соң сәбиімен бірге суға секірген сарыағаштық әйелге қатысты сот үкімі шықты. 

«Экспресс К» басылымының жазуынша, жантүршігерлік қайғылы оқиға Түркістан облысы Сарыағаш ауданы Құрқұлес ауылында болған. Тергеу материалдарына сәйкес, өткен жылдың 10 желтоқсанында 22 жастағы Аружан Әбдібек қайын енесімен жанжалдасып қалған соң, үш айлық қызын өлтіріп, артынан өзіне қол салуға бел буады.

«Жас келіншек ауыл шетінде ағып жатқан Келес өзеніне батып өлмек болып, баласын құшақтаған қалпы суға түседі.  Су деңгейі мойнына жеткенде ғана күрт тоқтап, ойланады. Өзеннің ортасында бірнеше минут тұрған әйел өзін өлімге қия алмайды. Ол жағаға қайта шыққанда баланың демі үзіліп кеткен еді», делінген хабарламада.

Аружан Әбдібекке қатысты нәрестесін өлтіру фактісі бойынша полицейлер  Қылмыстық кодекстің 99-бабы 3-бөлігі бойынша жауапкершілік қарастыратын қылмыстық іс қозғады. Тергеу аяқталысымен іс сотқа жіберілді.

Прокурор әйелдің бұрын сотталмағанына және өз әрекетіне өкінетініне қарамастан, оны 15 жылға дейін бас бостандығынан айыруды сұрады. Түркістан облысының Қылмыстық істер жөніндегі мамандандырылған ауданаралық сотының судьясы Қасым Қалмағамбетов айыптау тарапының ұстанымымен келісті.

Айжан Әбдібек жазасын қатаң режимдегі колонияда өтейтін болды.

Aikyn.kz | Бүгінгі жаңалықтар. Әлем және Қазақстан жаңалықтары.