Елордада бөтен адамның көлігіне рұқсатсыз отырып алып, шықпай қойған қыз алаяқ емес. Бұл туралы қалалық полиция департаменті айтты, – деп хабарлайды Almaty.tv.
Шамамен бір апта бұрын жергілікті тұрғын оның көлігіне кіріп, бірнеше минут отырған белгісіз адамның әрекетіне шағымданған еді. Ол тіпті, құқық қорғау органдарына жүгінген. Оның айтуынша, бейтаныс ару көліктен шығу талаптарын елемеген. Әлеуметтік желі қолданушылары да мұндай оқиғаға тап болғандарын жазған еді.
Ерсін Төлегенов мешіттен шықаннан кейін көлігіне отырып, жүруге оқталғанда белгісіз қыз оның темір тұлпарының артқы орындығына отырып алған. Ер адам одан бірнеше рет шығуды өтінеді, алайда әлгі қыз оның сөзін елемейді.
«Ойладым, құлағы естімей ме? Сөйлей алмай ма? Телефонға жаздым, көрсеттім. Жауап жоқ. «Мені қазір алып кетеді» деп жан-жағына қарап, қайталай береді. Сосын машинадан шықтым да «қарындас, шығыңыз, маған жүру керек» деп 1-2 рет қайталадым. Тұрды да, жан-жағына қарап шықты машинадан», – деді қала тұрғыны Ерсін Төлегенов.
Мұндай оқиғаға бірнеше адамның да басынан өтіпті. Әлеуметтік желілерде сол қыздың жанармай құю бекеттері мен автотұрақтарда басқа адамдардың көліктеріне отырғаны туралы бейнелер бар. Интернет қолданушыларының басым бөлігі қыздың әрекетін алаяқтыққа теңеген. Алайда тәртіп сақшылары бұл жағдайда ешқандай қылмыс анықталмағанын айтады.
«Биыл 8 маусымда белгісіз әйелдің бөтен көлікке отырғаны және сыртқа шығудан бас тартқаны туралы хабарлама келіп түсті. Есіл ауданының полиция қызметкерлері осындай фактілерге жол бермеу туралы алдын алу бойынша әңгіме жүргізді. Әйел тарапынан басқа да заңсыз әрекеттер анықталған жоқ», – деді Нұр-Сұлтан қаласы ПД баспасөз қызметінің жетекшісі Эльмира Шәуленова.
Бөтеннің көлігіне еш рұқсатсыз кіруге қызға не түрткі болғанын психологтан сұрадық. Бейнекадрларды көрген соң Анна Поздеева адамның психиатриялық ауруы бар немесе есірткінің әсерінен болуы мүмкін деген болжам жасады. Бұдан бөлек, психолог басқа да нұсқаларды алға тартты.
«Бұл ойын қағидаты бойынша интернет-құбылыс болуы мүмкін. Қазір көптеген ойын түрлері бар. Мысалы, «Кальмар ойыны», тапсырма берілген кезде сіз өзіңізді түсіріп, әрекетіңізді дәлелдеуіңіз керек. Егер сіз бұл тапсырманы орындаған болсаңыз, онда сіз келесі деңгейге өтесіз. Осындай көрінісі болуы мүмкін. Ол үшін ақша төлейді десем де қателеспеспін», – деді психолог Анна Поздеева.
Психологтың айтуынша, қыздың іс-әрекетінде алаяқтық белгілері жоқ. Сондықтан автокөлік жүргізушілеріне алаңдамауға кеңес берді. Ал, полиция департаментінің өкілдері егер жағдай қайталанса, «102» жедел қызметіне қоңырау шалған абзал деп отыр.
