Ертең 2 пайыздық ипотекаға өтініш қабылдау басталады. Құжат тапсыру уақыты шектеулі

Ертең 2 пайыздық ипотекаға өтініш қабылдау басталады. Құжат тапсыру уақыты шектеулі 1

Екі пайыздық несиемен пәтер немесе жеке үй алуға ниеттенген қазақстандықтар 20 маусымнан бастап "Бақытты отбасы" бағдарламасы бойынша құжат рәсімдей алады. Алайда, аталған бағдарлама арқылы ипотека рәсімдеуге бөлінген уақыт бір аймен шектелген. Тұрғын үй алу үшін екі пайыздық несие алуға үмітті азаматтардан құжат қабылдау осы жылдың 19 шілдесі күні тоқтайды. "Бақытты отбасы" бағдарламасы бойынша жеке үй, қолдан сатылатын екінші деңгейлі пәтерлер немесе жаңа пәтер алуға мүмкіндік бар.

"Несие алуға үмітті азаматтардың жергілікті атқару органдарында кезекте тұруы шарт. Екі пайыздық несиені толық емес отбасы, мүгедек балаларды тәрбиелеп отырған отбасы және көпбалалалы отбасылар ала алады", - дейді "Отбасы банкінің" баспасөз қызметі.

Ипотекаға үмітті азаматтар үй құнының 10 пайызын алдын-ала төлеуге тиіс. Несиені қайтару мерзімі – 18 жыл. Екі пайыздық несие бағдарламасы бойынша Нұр-Сұлтан, Алматы, Ақтау, Атырау, Шымкент қалаларының тұрғындарына 15 миллион теңгеден бөлінсе, Қазақстанның басқа қалаларының тұрғындары үшін тиесілі сома 10 миллион теңгені құрайды.

"Бақытты отбасы" бағдарламасы үшін 50 миллиард теңге бөлінген. Ипотека алу үшін өтінішті банктің ресми сайты арқылы жіберуге болады.

Aikyn.kz | Бүгінгі жаңалықтар. Әлем және Қазақстан жаңалықтары.