Алматыда қалалық филиалдың Саяси кеңесі Бюросының және Алматы қаласы мәслихатындағы «AMANAT» депутаттық фракциясының кеңейтілген отырысы өтті. Оған Парламент Мәжілісінің депутаттары – «AMANAT» партиясы фракциясының мүшелері қатысты.
Отырыста халықтың өмір сүру жағдайын, жол-көлік инфрақұрылымын және экологиялық ахуалды жақсарту, сондай-ақ білім беру және медицина нысандарын салу мәселелері қаралды. Алматы қаласы әкімінің орынбасары Әлішер Әбдіқадыров «AMANAT» партиясының сайлауалды бағдарламасының 2022 жылдың бірінші жартыжылдығында 12 бағыт бойынша жүзеге асырылу барысы туралы баяндады.
Мәселен, биыл Жол картасының 148 пункті іске асырылу сатысында тұр. Бүгінде 45 шақырым сумен жабдықтау және кәріз желілері салынды. 2022 жылы «Алмагүл» қосалқы станциясының құрылысы аяқталады. 138 шақырым электр және 17 шақырым жылу желілері жаңғыртылатын болады.
Қаладағы экологиялық жағдайды жақсарту мақсатында жыл басынан бері 145 мың көшет отырғызылды, жыл соңына дейін тағы 360 мың ағаш отырғызу жоспарлануда. Газбен жүретін 300 автобус сатып алынды. Алайда партиялықтарда қоғамдық көліктерді газбен толтыруға қатысты сұрақтар туындады. Алматылықтар таңертең аялдамаларда қоғамдық көлік ұзақ күтіп тұрады, ал жанар-жағар май құю бекеттерінде автобустардың үлкен кезегі байқалады.
Қалалық Мобильділік басқармасы өкілінің айтуынша, қазір алты бекеттің екеуі ғана жұмыс істейді, дегенмен газ стансасы құрылысының тиісті жобасына қаражат бөлінген.
Сонымен қатар жыл соңына дейін 14 мыңға жуық оқушы орнына арналған 18 орта білім беру нысаны іске қосылмақ. Бұл жоспарға 10 750 орындық 11 мектеп, 1 270 орындық 5 қосымша құрылыс, 1 800 орындық 2 ғимаратты сатып алу кіреді.
Өз кезегінде, мәжілісмен Бекқали Торғаев биыл аяқталуы тиіс 5 мектептің құрылысына қатысты алаңдаушылық білдірді.
«Бұл нысандар өткен жылдан бері өтпелі болып келеді. Соның бірі – «Мәдениет» шағынауданында мектеп құрылысы. Құрылыс басқармасының есептеуінше, мектеп тамыз айында пайдалануға беріледі. Алайда нысанға барғаннан кейін құрылыс жұмыстары баяу жүргізіліп жатқанын көрдім. Мектептің инфрақұрылымы мен абаттандыру мәселелері де ерекше бақылауды талап етеді», – деді Б.Торғаев.
Тиісті басқармада келісімшартқа сәйкес «Мәдениет» шағынауданында мектеп құрылысы тамыз айының соңына дейін аяқталатынына сендірді. Бұл үшін барлық техника мен 400-ге жуық жұмысшы жұмылдырылған.
Сондай-ақ депутат Мәди Ахметов мегаполистегі жастар мәселесін көтерді. Атап айтқанда, NEET санатындағы жастарды әлеуметтендіру және жұмыспен қамтудың белсенді шараларымен қамту, жастар практикасы және жұмыс орындарын ашу мәселелері қозғалды.
Отырысты қорытындылай келе, мәжілісмендер партияның сайлауалды бағдарламасының Жол картасын жүзеге асыру партиялықтардың ерекше бақылауында екенін атап өтті.
