Оқу-ағарту министрлігі балабақшалардың жұмысына қатысты ондаған арыз-шағым түскенін мәлімдеді.
Еліміздегі балабақшалардағы балаларға қарау жағдайына, қызметкерлердің жұмысына, сондай-ақ бүлдіршіндердің денсаулығына әрі өміріне зиян келтіруге қатысты түрлі шағым түскен.
«Соңғы түскен арыз-шағымдар бойынша тексеру жүргізіліп, балалардың өмірі мен денсаулығына зиян келтіру фактілері бойынша 5 әкімшілік іс қозғалды. Ішкі істер министрлігі мектепке дейінгі ұйымдарға қатысты 15 әкімшілік іс қозғады. Резонанс тудырған оқиғалардың бірі ретінде Нұр-Сұлтан қаласындағы «Сати» жекеменшік балабақшасында бүлдіршіндерге қатысты заңсыз фактілер тіркелген. Онда балабақша қызметкерлері балаларды сүйреп, бұрышқа тұрғызып, дауыс көтерген», – делінген министрлік мәліметінде.
Мысалы, Атырау қаласындағы жекеменшік мектепке дейінгі мекемеде топтағы балалардың көп болуына байланысты тәрбиеші балаларға дұрыс қарамаған. Салдарынан балабақшадағы үш бүлдіршін үш жасар қызды ұрып-соғып, денесіне зақым келтірген.
«Қызылордада жекеменшік балабақшалардың бірінің жүргізушісі мекемеге 7 баланы алып келген. Балаларды балабақшаға кіргізген тәрбиешінің көмекшісі бір баланың көшеде қалып қойғанын байқамай қалған. Жүргізуші де балаға мән бермей, баланы қағып кеткен. Осының салдарынан бала ауруханаға бара жатқан жолда көз жұмды. Осы факті бойынша қылмыстық іс қозғалды», – делінген ведомство хабарламасында.
Сонымен қатар Теміртауда қыздың бетін көрпемен жауып, баланы тұншықтырмақ болған тәрбиешіге қатысты үкім шықты. Сот тәрбиешіні Қылмыстық кодекстің 140-бабы 2-бөлігі бойынша кінәлі деп таныды. Оны 3 жыл мерзімге кәмелетке толмағандармен жұмыс істеу құқығынан айырып, 120 сағатқа қоғамдық жұмыстарға тарту жазасын тағайындады.
Бүгінде балабақша ашу және жұмыс істеу үшін уәкілетті органға хабарлама жіберу жеткілікті. Алайда білім басқармаларының мектепке дейінгі ұйымдарды аралап, тексеруге заңды құқығы жоқ.
«Осыған байланысты балабақшаларды лицензиялау бастамасы қолға алынып жатыр. Бұл балабақшалардағы жағдайға, қызметкерлердің біліктілігіне, санитарлық және өрт қауіпсіздігі ережелерінің сақталуына, тамақ өнімдерінің сапасына, бейнебақылау камераларының жұмысына және басқа да талаптарды белгілейді», – делінген министрлік түсініктемесінде.
