Дизель отыны тағы да таусылды

дизель
© коллаж: Елдар Қаба

Жетісу облысында соңғы бі­рер күнде дизель отынының жетіспеушілігі сезіле бас­тады. Әсіресе, облыс орталы­ғы Тал­дықорған қаласындағы жанар-жағармай құю стан­са­ларында дизель отынын та­лонмен ғана босатып жатыр.

Талоны жоқ жүргізушілердің көліктері қаңтарулы тұр. Жүк тасымалдайтын ауыр көліктер де межелі жеріне жете алмай қалған. Олардың айтуынша, жанар-жағар май құю стансаларында шектеу енгізіп тас­таған. Тек 50 литрден береді. Ал мұндай көлемдегі дизель отыны ауыр жүк көліктеріне жұғын да бол­майды. Осылайша әлекке түскен жүргізушілердің кейбірінің көлігі Сарқанда, енді бірі Қабанбайда қаңтарылып қал­ған. Жолда бірнеше күн құр тұрып қалу жүргізушілер үшін үлкен шығын. Әсіресе жүкті тиесілі жерге уақытында жетпей бұзы­лып жатса тіптен қиын.

– Жүк көлігім Сарқанда тұрғанына бірнеше күн болды. Ауданда егін орағы қызу жүріп жатыр. Талдықорғанға астық тиеп келуім керек еді. Солярка жоқ. Жылдағы жағдай осы. Көктемде жер жыртып, егін саларда, күзгі жиын-те­рім кезінде қолдан тапшылық ту­дырып, жанар майдың бағасын қымбаттатып жібереді. Мұның соңы тауардың өзге түрлерінің құнының өсуіне әкеп соғады. Бұл жолы да солай болады деп ойлаймын, – дейді Мархат Иманбаев.

Өз кезегінде Талдықорған қаласының әкімі Әсет Масабаев кәсіпкерлермен кездесіп, талон мәселесін шешуге уәде берді.

«Тізім жасап, жанар-жағар май құю стансаларының иелерімен жолығып, өзара келісімге келуге тырысамыз. Барлығы дұ­рыс болса, бірер күнде жүргізу­шілер қажетті талондарды алатын болады», – деді қала басшысы.

Жетісу облысы әкімдігінің кә­сіпкерлік басқармасындағылар да дизель отынының тапшылығы сұраныстың күрт артуынан туындағанын айтады. Қоймалардағы жанармай қоры сарқылып жатыр. Қазіргі кезде облыста 1000 тоннаға жуық дизель отыны бар. Энергетика министрлігінің араласуымен Жетісу облысына 610 тонна дизельдік отын жөнелтілген. Қалған 400 тонна жанармай жолда келе жатыр екен.

Алайда бұл күзгі жиын-терін қарсаңындағы аяқ-қолы тұсауланып қалған шаруалардың мәселесін шешуге сеп болар-болмасын уақыт көрсетеді.

Болат АБАҒАН,
Жетісу облысы

Aikyn.kz | Бүгінгі жаңалықтар. Әлем және Қазақстан жаңалықтары.