Әлемдік және дәстүрлі діндер лидерлері съезінің ХХ хатшылығына төрағалық етуші Сенат Төрағасы Мәулен Әшімбаев кезекті съездің мәні мен маңызы жайлы айтты. Ол биылғы съезд пандемиядан кейін өтіп отырғандықтан, талқылайтын тақырыптар өте маңызды екеніне тоқталды.
Биыл съезге әлемнің 50 елінен делегация қатысады. Съезде 2003 жылғы алғашқы жиынға қатысқан қатысушылар да бар. 2003 жылы съезге 17 елдің дін өкілдері қатысқан. Ал бүгінде қатысушылар саны артты. Бұл жағдай халықаралық съезд мәртебесінің өсе түскенін айқындайды.
"Бүгінде климаттың өзгеруі, пандемия сияқты мәселелер барша әлемге жан-жақтан өзінің әсерін тигізуде. Одан бөлек түрлі елдер арасындағы қақтығыстар, терроризмге ниетті топтар адамдардың бірлігіне қауіп төндіріп отыр.
Өткелі отырған съездің мақсаты – диалогке шақыру, қақтығыстарды тоқтату, бейбітшілікке қол жеткізу.
Экологиялық таза әлем құру үшін саясаткерлер мен кәсіпкерлердің күші жеткіліксіз. Бұл жолда дін өкілдерінің бір жерге жиылып, өзекті мәселелерді талқылауы өте маңызды. Адамзаттың гүлденуі жолында осы съезді кезекті рет өткізіп отырмыз.
VII съезде өзекті мәселелерді талқылап, солардың шешу жолы мен жауабын алуға тырысатын боламыз. Әлемдік және дәстүрлі діндер лидерлерінің VII съезі жаһандық бейбітшілікке жету жолын айқындап береді деп сенеміз" – деді Мәулен Әшімбаев.
