Ақмола облысының Аршалы кентінде мектептің жылу қазандығы жарылып, үш адам зардап шекті, – деп хабарлайды ҚазАқпарат.
Ақмола облыстық білім басқармасының мәліметінше, Аршалы ауданының №3 мектебіндегі төтенше жағдайға байланысты аймақ басшысының бірінші орынбасары Мәлғаждар Тәткеевтің төрағалығымен жедел штаб құрылды. Оқиға орнына білім басқармасының басшысы Бейбіт Жүсіпов аттанды.
«Қазіргі кезде апаттың салдарын жою және жылу беруді қалпына келтіру бойынша жедел шаралар қабылданып жатыр. Балалардың ешқайсысы зардап шеккен жоқ, олар қашықтан оқытуға ауыстырылды. Сонымен бірге, өңірде мектептердегі барлық қазандықтарға тексеру жүргізіледі. Зардап шеккен үш ересек адамға барлық қажетті медициналық көмек көрсетілуде. Олқылыққа жол берген адамдар тексеруден кейін жауапқа тартылатын болады», – деді ҚазАқпарат тілшісінің сауалына білім басқармасы.
