Магистратураға грант тағайындау конкурсына қатысу үшін құжат қабылдау басталды.
Құжат қабылдау 12 желтоқсанға дейін жоғары оқу орындарының қабылдау комиссиялары, оның ішінде виртуалды қабылдау комиссиялары арқылы жүзеге асырылады. Барлығы 8 мыңнан астам адам магистратураға түсу үшін емтихан тапсырды. Олардың 40 пайызға жуығы шекті балл жинады. Орташа көрсеткіш – 69 балл. Ең жоғары балл – 127.
Кешенді тестілеу өткізу барысында 80 қатысушының нәтижесі жойылды. Оның ішінде 32 оқуға түсуші смартфон, көмекші құралдар және басқа да тыйым салынған заттарды алып өтуге тырысқаны үшін тест тапсыру мүмкіндігінен айырылды. Кешенді тестілеу кезінде ережелерді бұзғаны үшін аудиториядан 48 адам шығарылып, олардың нәтижесі жойылды.
«Құжаттарды тапсыру кезінде оқуға түсуші білім беру бағдарламаларының бір тобын және үш жоғары оқу орнын көрсетеді. Магистратураға білім беру грантын тағайындау конкурсы 15-25 желтоқсан аралығында өтеді. Магистратураға түсушілер 4 мыңға жуық мемлекеттік білім грантына үміткер бола алады», – деп хабарлады Ұлттық тестілеу орталығының директоры Руслан Емелбаев.
Магистратураға білім беру гранты иегерлерінің тізімі Ұлттық тестілеу орталығының сайтында және әлеуметтік желілерде жарияланады.
