Бауыржан ЫСҚАҚОВ,экономист, «Болашақ» бағдарламасының тәлімгері:
– Президент айтқандай, ауыл халқының әл-ауқатын дамытуға 1 трлн теңге бөлінетіні – көңіл көншітерлік жағдай. Мемлекет соңғы кезде ауылдардың әлеуметтік-экономикалық жағдайын жақсартуға ниеттеніп отырғаны белгілі. Түрлі бағдарламалар әзірленді, дегенмен кейбіреуі соңына дейін жеткен жоқ. Қаражаттың бей-берекет жұмсалуы, кейбір мүдделі топтарға ғана берілуі сияқты мәселелер кері әсер етті. Ауыл шаруашылығын дамытуы арқылы біз елдің ұлттық һәм экономикалық қауіпсіздігін қамтамасыз ете аламыз. Соңғы кездері ауылдан қалаға көшу үрдісі қарқын алды. Осы нәрсе әлеуметтік-экономикалық дағдарыстың туындауына әкеліп отыр. Қала мыңдаған адамның нөпіріне дайын емес, ал негізгі өндіріс көзі саналған ауыл өз мамандарынан айырылып қалуда. Яғни, ауыл еңбек ресурстарына зәру. Егер қазіргі үрдіс тоқтамайтын болса, 10-15 жылдан кейін тағы бір экономикалық дағдарысты кешуіміз мүмкін. Осы үшін мемлекет ауыл шаруашылығын басты міндеттердің біріне көтеруі тиіс.
Ауыл шаруашылығына қаржы құю арқылы біз саланы инвесторлардың ортасына айналдыра алуымыз қажет. Яғни, нарыққа бейімделген, дайын өнім шығаратын салаға айналғаны жөн. Экономикадағы түрлі секторларды тікелей ауыл шаруашылығымен байланыстыруымыз керек. Агробизнесті трансформациялау арқылы экономикаға импульс бере аламыз. Агроөнімдерді тасымалдау, сақтау, тыңайтқыштар шығару, техникаларды құруды өз кәсіпорындарымызға тапсырған жөн. Мемлекет тек қаржы құю арқылы саланы биікке көтере алмаймыз, біржақты емес, барлық ресурстарды жұмылдырған абзал. Қазір елдегі азық-түлік қымбатшылығының өзі осы саланың ілгері баспауынан шығып тұр. Яғни, біз шетелден азық-түлікпен қатар инфляцияны сатып алып отырмыз. Ең қажет деген ауыл шаруашылығы өнімдерімен халықты қамтамасыз ете алу – ең тиімді жол.
Сонымен қатар Мемлекет басшысының тапсырмасымен ауыл шаруашылығын қолдауға бағытталған қаржыны қатаң бақылауда ұстағанымыз жөн. Ол үшін жергілікті биліктерге ақшаның игерілуін көрсететін нақты шарттар қойған абзал.
