Петропавлдағы мектепте балтамен шабуылдаған оқушы сыныптастарына бірнеше күн бұрын телефон арқылы қоқан-лоқы көрсеткен, — деп хабарлайды Астана арнасы. Мектептің ата-аналары бұл туралы әлеуметтік желіде жазба жариялады. Айтуларынша, ақыл-есінде ақауы бар бала бірнеше күн бұрын бір оқушының үстіне қасақана шай төккен. Ал өткен аптаның бейсенбі күні сыныптастарына ақ бетперденің фотосын жіберіпті.
Үш күннен кейін ол дәл сол бетпердені киіп, оқушыларға балтаны ала жүгірген. Қазір аталған мектепте осы сияқты тағы бірнеше бала оқып жатқан көрінеді. Сондықтан ата-аналар балаларының қауіпсіздігіне алаңдаушылық білдіреді.
“Ол балаға ешкім тиіскен емес. Ол өз бетімен жүрді. Ал балаларға телефонмен түрлі нәрсені жібергенде жауапты тұлғалар сол кезден бастап оны жіті назарға алу керек еді. Ата-аналар ақыл-есі өзге балаларды бөлек оқыту керек деп есептейді. Қазір біз балаларымызды мектепке жіберуге қорқып отырмыз”, – дейді ата-ана Надежда Шушемоина.
Ал құзырлы орган және мектеп әкімшілігі бұл іске қатысты тергеу жүріп жатқандықтан, әзірге қандай да бір ақпарат бере алмайтындарын жеткізді.
