Батыс Қазақстан облысы бойынша 2009–2023 жылдары аралығында осы жоба аясында 8 551 маман ауылдарға жұмысқа жіберілген. Бұл туралы облыстық Стратегия және экономикалық даму басқармасының мамандары айтты.
«Дипломмен – ауылға» жобасының басында әлеуметтік қолдау тек әлеуметтік саланың: денсаулық сақтау, білім беру, әлеуметтік қамсыздандыру, мәдениет және спорт мамандарына көрсетілді. Кейінірек, Үкіметтің шешімі бойынша агроөнеркәсіптік кешен саласындағы мамандарға әлеуметтік қолдау көрсетіле бастады.
Бұл бағдарлама – енді ғана оқу бітірген жас мамандардың жұмысқа орналасуы үшін мемлекет тарапынан берілген үлкен мүмкіндік. Сол мүмкіндікті жібермеу болашақ жастардың қолында.
Ауылдық жерлерді білікті кадрлармен қамтамасыз ету мақсатында іске қосылған жоба облыста жемісті жұмыс істеп келеді. Бүгінге дейін осы жоба арқылы 1 598 дәрігер ауылдарға қызметке жіберілген. Жалпы, аймақта алыс аудандардағы дәрігер тапшылығы осы бағдарлама арқылы толығып отырғанын атап өту керек. Бұдан бөлек, 5 775 мұғалім, 127 әлеуметтік қамсыздандыру маманы, 534 мәдениет маманы, 228 спорт саласының қызметкері агроөнеркәсіп кешеніне – 263 маман мен 26 мемлекеттік қызметкер осы жоба арқылы ауылдарға жіберілген.
«Дипломмен ауылға» бағдарламасы жастарды ынталандыру мақсатында мемлекет тарапынан көтерме ақы мен баспана алуға жеңілдетілген несие ұсынады.
– 2023 жылы 509 маманға үй салуға немес сатып алуға деп бюджеттен 2 634,0 млн теңге бөлінді. Биыл 900 маман әлеуметтік көмек алады. Бүгінде 540 маман көтерме жәрдемақыны алып үлгерді. Биылдан бастап мамандар өтінішті онлайн береді, – дейді облыстық Стратегия және экономикалық даму басқармасының бөлім басшысы Райса Еркеғалиева.
Жанат ҚАЙЫРҒОЖИНА,
Батыс Қазақстан облысы