Бұл бағдарлама 35 жасқа дейінгі облыс тұрғындарына неғұрлым тиімді шарттармен тұрғын үй сатып алуға мүмкіндік береді.
Ұлытау облысының әкімдігінің «Отбасы банк» АҚ-мен бірлесіп қабылдаған бағдарламасы 2023-2026 жылдар аралығын қамтымақ. Өңірде аталған жобаға деген қызығушылық жоғары.
Қатысушылар үшін жылдық несие мөлшерлемесі – 5%. Қарыздың ең жоғары сомасы – 20 млн теңге. Бастапқы жарна үй бағасының кем дегенде 10%-ы болуы керек.
Алғашында негізінен білім беру, денсаулық сақтау салаларының өкілдері ғана жобаға қатыса алатын болса, тамыз айынан бастап қатысушылардың аясы кеңи түсті. Облыс басшысы аймаққа қажетті мамандықтарды ескере отырып, коммуналдық кәсіпорындар жұмыскерлері мен ауыл шаруашылығы және мемлекеттік қызмет салаларының өкілдерінің арасындағы жас мамандарға да аталған бағдарламаға қатысу мүмкіндігін берді.
– Мен осы бағдарламаның алғашқы кезеңіне қатысып, жеңілдетілген ипотекаға үй алған жастардың бірімін, – дейді Маржан Қожан.
Мектепте мұғалім болып істейтін ол бірнеше жыл пәтер жалдап тұрғанын айтады.
– Әрине, жалдамалы пәтерде тұру оңай емес. Мұны басымыздан өткердік. Бірнеше рет пәтер ауыстыруға тура келді. Өмірге сәбилеріміз келіп жатты. UlytauZhastary туралы естіген соң, бағдарлама талаптарымен танысып, тиісті құжаттарымды жинап, өтінішімді қалдырған болатынмын. Содан маусымның бас кезінде облыстық әкімдікке шақырды. Облыс әкімі Берік Әбдіғалиұлының қолынан сертификат алдым. Қазір өзіміздің 3 бөлмелі пәтерімізде тұрып жатырмыз, – дейді Маржан.
Ulytau zhastary бағдарламасына қатысушыларға қойылатын талаптар да күрделі емес. Біріншіден, қатысушының жасы өтініш берген кезде 35 жастан (қоса алғанда) аспауға тиіс. Екіншіден, бағдарламаға қатысушының және оның отбасы мүшелерінің ҚР аумағы бойынша соңғы 5 жылда меншік құқығындағы тұрғын үйдің болмауы керек. Үшіншіден, таңдалған саладағы ресми жұмыс өтілінің болуы және кемінде үздіксіз соңғы 1 жыл бойы зейнетақы жарналарының міндетті түрде төленгендігін растау міндетті. Төртіншіден, бағдарламаға қатысушы Ұлытау облысында кемінде соңғы 1 жыл үздіксіз тұрақты тіркелген болуы тиіс. Бесіншіден, бағдарламаға ерлі-зайыптылардың біреуі ғана қатыса алады. Ең көп балл жинағандар (некеде тұрған жылдар саны, балаларының болуы, жұмыс өтілі және т.б.) қатысушының несие төлеу қабілеттілігін айқындау үшін «Отбасы банк» АҚ-ға жіберіледі.
Жаңадан құрылған облыста халық санын тұрақтандыру тұрғысынан келгенде де бұл бағдарламаның берері мол болмақ. Жеңілдікпен баспаналы болып жатқан жастар облыстың дамуы жолында еселі еңбектерін аянып қалмасы және белгілі.
Майлыбай КЕТЕ,
Ұлытау облысы