Әскери жиынға бұдан бөлек аумақтық қорғаныс бригадасының әскерилері, Ұлттық ұлан сарбаздары, Полиция департаментінің арнайы жасағы, облыстық Төтенше жағдайлар департаментінің жеке құрамы, медицина мамандары тартылған.
Әскери оқу-жаттығу облыс көлемінде өтіп жатыр. Бұл осымен екінші ауқымды жаттығу шарасы. Жоспар бойынша «Интергаз» мекемесіне сыртқы күштер шабуыл жасайды, ал әскерилер ғимаратты қорғауы тиіс. Арнайы белгіленген сценарий бойынша әрекет еткен әскерилер өздеріне берілген тапсырманы орындады. Әскерилердің жылдамдығы мен қырағылығы тексерілді. Мұндай оқу-жаттығу жұмыстарының мақсаты да сол. Әскерилер өздері білетін әскери дағдыны ұмытып қалмауы тиіс.
– Бүгін облыс аумағында әскери міндеттілермен оқу-жаттығу жұмыстары өтуде. Бүгін осымен аумақтық қорғаныс бригадасының белгіленген жоспар бойынша оқу-жаттығу жұмыстары аяқталады. Біздің аумақтық қорғаныс бригадасы өңірдегі маңызды нысандарды қорғайды. Бізде ондай 100 нысан бар. Бүгін сондай қорғаудағы аса маңызды нысанның бірі – «Интергаз» мекемесінің маңайында өтеді. Жоспар бойынша сыртқы күштер «Интергазға» шабуыл жасайды. Әскерилер нысанды қорғап қалуы керек, – дейді облыс әкімінің әскери қауіпсіздік қорғаныс мәселелері жөніндегі кеңесшісі Мақсат Мұқанов.
Бүгінгі әскери оқу-жаттығу жұмысы өз мақсатына жетті дейді мамандар. БҚО аумақтық қорғаныс бригадасы өткізген оқу-жаттығуға 100-ден аса әскери қатысты. Бірнеше әскери техника тартылды. Оқу-жаттығу жұмыстарын облыс әкімінің орынбасары Бақытжан Нарымбетов көрді. Оқу-жаттығу жұмысы аяқталысымен аймақ басшысының орынбасары әскерилерге алғыс білдірді.
– Мұндай әскери жиындардың негізгі мақсаты – запастағы әскерилердің жауынгерлік даярлығын шыңдау, бекітілген техника мен қару жарақты қолдану шеберлігін арттыру. Қазіргі жаһандық жағдайдағы сын-қатерлерді ескере отырып, жоспар бойынша оқу-жаттығу жиындарын БҚО-да аумақтық қорғаныс бригадасының басқаруымен өткізіп отырмыз. Осы қыркүйек айында 180-нен астам адам осындай арнайы оқу-жаттығудан өтті. Мұндай ірі көлемдегі оқу-жаттығулар алдағы уақытта да ұйымдастырылатын болады. Күні кеше ғана облыс әкімі Нариман Төреғалиевтің қатысуымен әскери қалашықтың құрылысы басталды. Бүгін әскери оқу-жаттығу жұмыстарына қатысып, өздеріңізге берілген тапсырманы мінсіз орындағандарыңыз үшін алғыс айтамын, – деді БҚО әкімінің орынбасары Бақытжан Нарымбетов.
Жаттығу жұмыстарына белсенді қатысқан әскерилерді аймақ басшысының орынбасары Бақытжан Хаберұлы облыс әкімінің алғысхатымен марапаттады.
Жанат ҚАЙЫРҒОЖИНА,
Батыс Қазақстан облысы