Павлодарда ішімдікке салынған ананың 2,5 жасар қызы балалар үйіне өткізілді. Еріктілердің айтуынша, отбасының көршілері оларға хабарласып, баланың туыстары мас болғанын айтқан, – деп хабарлайды Aikyn.kz.
«Қыздың анасы ішімдікке салынып кеткен, ал бала антисанитариялық жағдайда өмір сүруге мәжбүр, сонымен қатар ішімдіктің дәмін татып үлгерген. Баланың қазірдің өзінде маскүнемдікпен ауыратынын, сыра ішіп, арзан шараппен ұйықтап жатқанын көршілері біледі. Біз отбасын бірнеше күн бойы бақылап отырдық, айтқан деректерінің рас екенін анықтадық», – дейді еріктілер.
Аталған жайтқа Облыстық полиция департаментінің өкілдері пікір білдірді.
– «Полицияға «Нұрмағамбетов көшесіндегі пәтерде біреулер алкоголь ішуде және онда жас бала бар» деген қоңырау түсті. Полиция осы жерге барды, ол жерде анасының алкогольді ішімдіктерін теріс пайдаланатыны, қызын тәрбиелеумен айналыспайтыны, өмір сүруге қолайлы жағдай жасамайтыны анықталды», – делінген ПД хабарламасында.
Ювеналды полиция қызметкері сәбидің анасына қатысты ҚР ӘҚБтК-нің 127-бабы бойынша әкімшілік материал толтырды.
– «Материал сотқа жіберілді. Кәмелетке толмаған бала балалар үйіне орналастырылды. Отбасы Павлодар қалалық Полиция басқармасына есепке алынды. Сондай-ақ ананың тәртібі кәмелетке толмағандардың құқығы және олардың құқықтарын қорғау жөніндегі қалалық комиссияда қаралатын болады», – деп хабарлады Павлодар облысы ПД.
Фото: Halyq Uni