Түркістан облысының бюджеті толықтай республикалық бюджет трансферттеріне тәуелді. Бұл аумақтық бөлінгенде негізгі өндіріс орындарының Шымкент қаласы аумағында қалып қойғанына байланысты. Орталық коммуникациялар қызметі алаңында өңірдің әлеуметтік-экономикалық дамуы туралы баяндама жасаған облыс басшысы Дархан Сатыбалды осылай мәлім етті, – деп хабарлайды Aikyn.kz.
Дегенмен, әкім биылғы жылдың 10 айында оң өсім бар екенін және жалпы өңірлік өнім көлемі 3 трлн теңгеден асқанын атап көрсетті. Нақтырақ айтқанда, өнеркәсіп өнім көлемі 2 пайызға артып, 758 млрд теңгені құрады.
Дархан Сатыбалды өсім негізінен сүт, тоқыма және электр жабдықтары өндірісінің есебінен болғанын жеткізді. Дегенмен қазіргі таңда облыс өнеркәсібінің негізін тау-кен, яғни уран өндірісі құрайтынын айтты.
«ҚазАтомпром» ұлттық компаниясы Созақ ауданында күкірт қышқылын өндіретін зауыт салуды жоспарлап отыр. Жер учаскесі анықталып, компания тарапынан техникалық-экономикалық негіздеме әзірленуде. Ендігі жылы құрылысы басталады. Жобаның құны – 100 млрд теңгеге жуық», – деп нақтылады өңір басшысы.
Сонымен қатар, облыстың өзіндік кірістерін көбейту үшін бірнеше маңызды жобалар жоспарланған. Оларды іске асыру есебінен өзіндік кірістерді алдағы 5 жылда қосымша 100 млрд теңгеге көбейту болжамдануда.
«Сондай-ақ, өңдеу өнеркәсібінде 20 жобаны жүзеге асыру жоспарланса, бүгінгі таңда 10 жоба іске асырылды», – деп мәлім етті Дархан Сатыбалды.