Түркістан облысында дүкеннен азық-түлік ұрлаған әйелдердің әрекеті бейнекамераға түсіп қалған. Қазір оларға қатысты сотқа дейінгі тергеу жүріп жатыр, – деп хабарлайды Aikyn.kz.
Аталған оқиға Бәйдібек ауданында боған. Аудандық полиция бөліміне арызданған жеке кәсіпкер дүкенінен белгісіз біреулердің азық-түлік ұрлап жүргенін айтқан.
Осы жағдайға қатысты тәртіп сақшылары қажетті іздестіру шараларын жүргізді. Күдіктілердің әрекеті бейнебақылау камерасына түсіп қалған видео арқылы дәлелденді.
«Ұрлыққа қатысы бар 43 пен 46 жас шамасындағы әйелдер анықталды. Алдын ала келісіп алған екеу тұтынушы кейпінде азық-түліктерді салып алып, білдірмей шығып кеткен. Қазіргі таңда қос әйелге қатысты сотқа дейінгі тергеу амалдары жүргізілуде», – делінген Түркістан облысы Полиция департаментінің баспасөз қызметі таратқан ақпаратта.