Мемлекеттік кеңесші Ерлан Қарин Президент Қасым-Жомарт Тоқаевтың Атырауда өткен Ұлттық құрылтайдың үшінші отырысында сөйлеген сөзіне қатысты пікір білдірді.
Президент қоғамдағы 5 кеселге күрес жариялады – Ерлан Қарин
Фото: baigenews.kz
503
оқылды

Мемлекеттік кеңесші Ерлан Қарин Президент Қасым-Жомарт Тоқаевтың Атырауда өткен Ұлттық құрылтайдың үшінші отырысында сөйлеген сөзіне қатысты пікір білдірді.

«Мемлекет басшысы Атырауда сөйлеген сөзінде мәдени-гуманитарлық даму саласында бірқатар жаңа бастама көтерді. Мен олардың негізгілерін бөліп көрсетпекпін. Біріншіден, "Айбын" орденінің дәрежелеріне Сағадат Нұрмағамбетов, Бауыржан Момышұлы, Рахымжан Қошқарбаев есімдерін беру туралы шешім қабылданды. Ол соғыс жылдарындағы барлық қазақстандықтың ерлігін бейнелейді. Екіншіден, Қожа Ахмет Ясауидің рухани мұрасын жүйелі түрде зерделеу және дәріптеу қажеттігі белгіленді. Осы бағыттағы кешенді жұмысқа Президент өткізуді тапсырған арнайы халықаралық симпозиум серпін беруге тиіс. Үшіншіден, Үстірт жазығы мен Маңғыстау жерасты мешіттерін ЮНЕСКО тізіміне енгізу жұмыстары басталады. Дәл осы тұрғыда Президенттің археология саласындағы заңнаманы лицензиялауды ретке келтіру және заңсыз археологиялық қазбалар үшін жауапкершілікті қатаңдату арқылы жетілдірудің маңыздылығы туралы ұсынысын қарастыру қажет», – деп жазды Ерлан Қарин Telegram-да. 

Оның атап өтуінше, Президент бұл бастамалар блогын тарихымыздың тұтастығы туралы өте ауқымды месседжмен астастырып, әртүрлі тарихи тұлғалар мен дәуірлерді қарама-қарсы қоюға жол бермеуге ерекше назар аударды. Еліміз үшін төтенше бағалаудан, мифтік шығармашылық пен алыпсатарлықтан ада тұтас әрі ауқымды тарихи нарратив құру аса маңызды.

«Сондықтан Президент тарихты жан-жақты, терең және шынайы зерттеу үшін эмоция мен манипуляция емес, жүйелі іс-шаралар мен ойластырылған талдау қажет екенін тағы да атап өтті. Мемлекет басшысының сөйлеген сөзінің маңызды бөлігі қоғамдық бес кеселге – нашақорлыққа, лудоманияға, зорлық-зомбылыққа, вандализмге және ысырапшылдыққа қарсы жалпыұлттық күресті жариялау болды. Бұл ұлттың денсаулығына нұқсан келтіреді, адамдардың, әсіресе жастардың тағдырын бұзады, ұлттың ілгерілеуін тежейді. Прогрессивті қоғамдағы әлеуметтік әділеттілік пен теңдіктің негізгі шарты саналатын әйелдердің отбасында кемсіту мен жәбірлеуге ұшырауына қарсы іс-қимылды күшейтуге ерекше назар аударылады. Шын мәнінде, Президент барлығына ортақ, нақты міндет қойды. Оны шешпей біз алға қойған стратегиялық мақсаттарға қол жеткізе алмаймыз. Сондықтан  осы әлеуметтік кемшіліктермен табысты күресу үшін тек мемлекеттік органдарды емес, сонымен бірге қоғамның барлық салауатты күшін белсенді қатысуға жұмылдыру қажет», – деді Мемлекеттік кеңесші.

Ерлан Қариннің айтуынша, ұлттық құрылтайдың Атырауда өткен отырысының басты ерекшелігі – Мемлекет басшысы осыған дейін айтқан идеологемаларды қорыта келе, жалпыұлттық құндылықтардың нақты тізімін ұсынғанында.

"Бұл – Тәуелсіздік және Отаншылдық, Бірлік және Ынтымақ, Әділдік және Жауапкершілік, Заң және Тәртіп, Еңбекқорлық және Кәсіби біліктілік, Жасампаздық және Жаңашылдық.
Осы құндылықтар тұғырнамасы мемлекеттің білім беру саласындағы, өскелең ұрпақ тәрбиесіндегі және мәдени-ағарту жұмысындағы басты бағдары болады. Бұл құндылықтар қазіргі кездегі идеологемаларды ғана емес, сонымен бірге бәріміз қалыптастыруға тиіс жаңа әлеуметтік этиканың контурын айшықтайды.
Мемлекет басшысы құрылтайда сөйлеген сөзінде «Біздің алдымызда үш айрық жол тұр: құлдырау, тоқырау немесе өрлеу. Біз әрдайым өрлеуді таңдаймыз», – деді. Өрлеуге ұмтылу – елдің дамуына кедергі келтіретін барлық нәрседен бас тартуды ғана емес, барша азаматтардың өзін-өзі дамытуға деген белсенді ұмтылысын да білдіреді. Сондықтан бұл құндылықтар, қоғамда бүкіл еліміздің және әрбір азаматтың мүддесін тоғыстыратын прогрессивті мінез-құлық үлгілерін қалыптастыруды көздейді",- дейді ол.