Атап айтсақ, депутат ауданға қажет 10 арнайы техника, 50 000 қап жеткізді. Аталған ауданға қарасты 17 елді мекен Жайық өзені бойында орналасқан. Ал су тасқынына қорғау бөгеттерінің жалпы ұзындығы 100 шақырымға жуықтайды.
Бүгінде депутат Атырау қаласы Алмалы ауылының іргесінде салынып жатқан су тасқынынан қорғау бөгетінің құрылысына атсалысуда. Оның жалпы ұзындығы – 7 шақырым, биіктігі – 3 метр.
Сонымен қатар депутат Әділ Жұбанов облыстық штаб отырысында су тасқынының алдын алу жұмысымен және қаладағы судан қорғану бөгеттерінің жай-күйімен, төтенше жағдайдағы іс-қимыл алгоритмімен танысты.
Бүгінде өңірдегі құрылыс және ірі мұнай компаниялары облыстық штабтың ұйымдастыруымен жағалауларды бекітуге, қорғаныс дамбаларын тұрғызуға жұмылдырылып, қажетті материалдар резерві, эвакуациялау пункттері дайындалып, инертті заттар жинақталды.
Облыстағы Қызылқоға ауданы Миялы, Жангелдин, Көздіқара ауылдық округтерінде, Аққора, Жасқайрат ауылдарында қауіп сейілді. Тайсойған, Тасшағыл, Қарабау ауылдарында жағдай тұрақталды.
Бүгінде Жылыой ауданының орталығы Құлсары қаласындағы ахуал – күрделі. Қалаға қарасты «Жадырасын–2», «Болашақ», «Вахталық кент» шағынаудандарын, «Қарағай» елді мекендерін су басып қалды. Су жайылған 2 600-ден астам жеке тұрғын үйден 16 мыңға жуық адам эвакуацияланды.
Өңірден сайланған депутаттар қауіп сейіліп, жағдай тұрақталғанға дейін аймақтарда болмақ.