Университет басшылығының бастамасымен 4-5 сәуірде оқу орнында су тасқынынан зардап шеккен өңірлерге көмек көрсету мақсатында қайырымдылық жәрмеңкесі ұйымдастырылды.
Абай университеті Құлсары қаласына гуманитарлық көмек жіберді
1,469
оқылды

Абай атындағы ҚазҰПУ ұжымы су тасқынынан зардап шеккен Атырау облысы Құлсары қаласының тұрғындарына гуманитарлық көмек жолдады.

Университет басшылығының бастамасымен 4-5 сәуірде оқу орнында су тасқынынан зардап шеккен өңірлерге көмек көрсету мақсатында қайырымдылық жәрмеңкесі ұйымдастырылды. Жәрмеңкеге университет оқытушылары, барлық институт студенттері мен кәсіподақ ұйымы атсалысып, қайырымдылық шарасын қолдады.

Нәтижесінде қайырымдылық жәрмеңкесінен жиналған қаржыға гуманитарлық көмек ретінде тұрмыстық керек-жарақтар, азық-түлік өнімдері, жеке гигиеналық құралдар мен төсек жабдықтары және өзге де қажетті заттар сатып алынды. 

Барлық жиналған зат пен азық-түлік Алмалы ауданының комьюнити орталығында ашылған қалалық гуманитарлық көмек қабылдау пунктіне жеткізілді. Аталған көмек көрсету пункті жиналған гуманитарлық көмекті су тасқынынан зардап шеккен Атырау облысындағы Құлсары қаласына жөнелтеді.

«Ел басына күн туған осындай қиын-қыстау кезеңде бір-бірімізге қол ұшын созып, қолдау көрсету – азаматтық парызымыз. Су тасқынынан зардап шеккен отандастарымызға көмектесу мақсатында Абай университеті ұйымдастырған қайырымдылық шарасы ізгілік ниетінен туындап отырғанын айта кету керек. Осындай қиын сәтте күш біріктіріп, қиындықтарды бірге жеңу аса маңызды», – деді белсенділер.